Zinadine Zidane kan hria; Ronaldo Luiz nazario de Lima pawh kan hria;Thiery Henry pawh kan hre vek. Inkelh an thiam a, inkhelh ngainatute tan chuan ngaihsan loh rual an ni lo, khawvela chawimawina sang ber ber leh hlu ber ber an dawng tawh tlat alawm! Mahse, Football khawvel 90’s chho vela sawi nghingtu David Beckham erawh a bangah chawimawina sang ber ber leh ropui tak takte intar phe chuai suh mahsela, a chanchin hi kan sawi bang thei mawlh dawn lo a nih hi! Kan ‘nghilhloh’ kumkhua tur a ni.
MIFING TEN RIMTUI AN HLAN VE LOH LAL THAR LO PIANGA CHU! :
May ni 2, 1975 khan Whipps Cross University Hospital, Leytonstone, London, England-ah Khawvel mipate zinga sakhming mawi ber ni turin ‘ David Robert Joseph Beckham’ hi alo piang a. A pa hi David Edward Alan Ted Beckham niin ‘Kitchen Fitter’ a ni a, tin, a nu hi Sandra Georgina niin ‘ hair dresser’ a ni bawk.
Beckham a nu leh pate hi Manchester United fans ruh tak niin an hman phawt chuan Old Trafford, Manchester-ah inkhel en turin London atangin an kal vang vang thin a ni. A nu leh a pate atang daih tawh hian ‘a sen’ hmangaihna hian a thinlungah zung alo kaih tawh a ni. ‘Football’ in a cheng bawr a vawnna inchhunga seilian a nih avang hian Beckham hian football hi a ngainat phah hle a ni.
“SIKUL KA KAL PEIHLO, KA INKHEL DUH ZAWK” :
Mizo naupang inkhelh ngaina tute ang bawkin Beckham pawh hian inkhelh hi a atchilh hle a, kum 1991 khan kum 16 mi lek a nih laiin thiamna run sang zawk bel duh lovin a hmangaih em em ‘football’ tan a nun pum hlanin a inpumpek ta a ni. Mahse, mi taima leh tumruh tak a nih avangin duhthlanna a siam suallo chiang hle. Kum 2007 a interview an neihnaah chuan Beckham chuan a naupan lai hun sawiin, “ Sikul ka kal laiin kan zirtirtu pakhat chuan ‘enge I upat hunah nih I duh?’ tiin min zawt a, kei chuan, ‘Fooballer nih ka duh’ ka ti a. Ani chuan, ‘I upat huna I hnathawh tur alawm ka zawh che??’ an tih leh chuan, ‘chu chauh chu alawm ka duh’ tiin ka ka chhang a, mak ati hle a ni.” tiin a sawi.
MANCHESTER UNITED AH :
1991 vek hian ‘Manchester United Youth Training Scheme’ zawm vein a talent neihthat zia hailan a nih hnuin Tottenham Hotspurs ah trail a nei ve a, mahse vanduaithlak takin a tlinglo hlauh a ni. Beckham hian Manchester United Youth team zawmin 1992 a FA YOUTH CUP final second leg-ah Gary & Phil Neville, Paul Scholes, Nickey Butt te nen khel hovin Crystal Palace lamah goal a thun ve nghe nghe a ni. Hemi tuma United youth team te hi ‘ Greatest generation of Manchester United’ anti hial a ni. Hemi kum vek hian Leaque Cup a Brighton nen an inkhelh tumin substitute-ah awmin Manchester United senior team tan a inlan ve a ni. Hemi hnu reilo teah hian Sir.Alex Ferguson chuan ‘professional contract’ a ziahpui nghe nghe a ni. 1993 ah Youth Cup ah Manchester United champion pui lehin ,1994 ah reserve team leaque-ah a champion pui leh bawk a ni.
Kum 1994-95 season khan Sir.Alex-a chuan first team experience a neih theih na'n tiin ‘Preston North End’ ah loan in a kaltir a, hetah hian a che tha nek ni tur a ni, April ni 2, 1995 a Leeds United nen a an inkhelh tumin senior team-ah a rawn inlan leh a ni. 1994-95 season chuan first team players 3 lai an chhuah tak avangin Alex-a chuan players thar lei lovin tleirawl rual a chhawr a, hei hi Media lam chuan an sawisel nasa hle a nih kha. Mahse, hemi tum hian Manchester united chuan ‘Premiership’ leh ‘FA Cup’ la in, Beckham hi player thawhhlawk berte zinga mi a ni nghe nghe a ni. 1996 alo in her chhuah meuh chuan England captain te zinga a hming dai ngai leh tawhlo tur Captain David Beckham-a hming chu England National team squad ah a chuang ve ta a ni.
Manchester United-a a khelh dan chanchin leh a chawimawina dawn leh cup a lakpuite chu sawi vek sen an ni lova, mahse chung zinga kan sawi loh theihloh chu 1998-99 season-a ‘Treble Cup’ Manchester United in an lak tum kha a ni. Hemi season-ah hian United chuan Premier Leaque, FA Cup leh UEFA Champions Leaque te an hui vek a, Beckham hi player pawimawh berte zinga mi niin fans te’n an fak ning thei mawlh lo a ni. Chanchinbu leh Magazine, David Beckham a thlalak chuan ve lohnate chu hralhna an hmu zo meuh tawh lova, commentator ten tawng an inchuh ta rap rap mai! ‘European Player of the Year’ a ni lo; ‘FIFA Player of the Year’ pawh a ni hek lo. Mahse, ESPN, Sky Sports leh StarSports te tial hneh bertu a ni lawi si! Manchester United show room ah ‘Jersey No.7’ a inkhai rei hman tawh lo! England khawpui zawng zawngahte chuan a thlalak a phe chuai a, rawlthar/tlangval Beckham-a hair style ang pu ve lo chu nula hovin an hmu tai hlei thei ta tlat lo! Khatih hun lai kha ka ngaihtuah let hian ‘Lionel Messi’ leh ‘Christiano Ronaldo’ te hian ‘an khum a ni’ ti thin mahse ka pawm thei lo. Tin, kum 1999 a Manchester United UCL a an champion tum pawh khan player pawimawh berte zinga mi a ni leh a ni.
SAWM THAH NIAH PAWH VAWIKHAT LUNGNGAIH CHU A AWM CHAWK :
Kum zabi thar alo in her chhuah meuh chuan Aamir Khan-a ten ‘Dekho 2000’ chet hit pui viau mahse, Manchester United ropui taka khawvel ngam puitu David Beckham tan erawh sawiselna leh sawichhiatnate nasa takin a rawn inlar thung a.
1999 World Club Championship-a Necaxa nen an inkhelh tuma a red card hmuh dan mawi vaklo te chuan sawizui a hlawh hle a, chanchinbumite chuan a nupui Victoria Beckham chuan Beckham chu kawng diklo lamah a hruai niah puhin Manchester United tana hralh mai a that thute an ziak chuai chuai mai a. Mahse, Sir Alex chuan Beckham chu chhanin Juventus lama kal tur anga an sawi lai pawh chuan a chelh lui hram hram a. Mahse, kum 2000 a rawn inher chhuah meuh chuan, Beckham-a leh an boss Alex-a te inkarah chuan sawihleihtheihloh khawpa thuk daidangtu khuarkhurum a rawn awm ta a. Hei hi Manchester United a a awm chhan, football aia hmingthanna leh ropuina ngainaah Alex-a’n a puh vang a ni. Nikhat chu a fapa Brooklyn damlohna avangin Beckham chuan training chawlh a dil a, damlohna leh chhungkaw thil pawimawhte a nih vangin Alex-a chuan a dilna chu lo pawmsakin Beckham chu a fapa enkawl tur chuan a awl ta a. Mahse chumi zan chuan a nupui Victoria chu London Fashion Weekah bawih angreng deuha a tei lai Alex-a chuan a hmu leh ta si a, chu chuan putar thin a ti sa kher mai! Alex-a chuan, “Victoria-i’n a fapa damlo pawh ngaihsak lova Fashion week-a a inthehparh hman a nih chuan Beckham pawh hian training a zawm hman ve tur a ni,” tiin Beckham-a chu pawisa, player in an chawi theih sang ber (kar 2 hlawh – £50,000 ) chawitirin an hmelma hlun Leeds United nen game pawimawh tak an khelh tumin a kheltir duhlo bawk a ni.
NI ROPUI A LO THLENG LEH TA! :
David Beckham hian Manchester United-a a awmlai hian Premiership title a lakpui mawlh mawlh ti ila kan sawi sual awm lo ve. 1999-2000 leh 2000-01 season-a BPL title United in an lak tum pawh khan, Beckham hi player pawimawh berte zing a mi a ni. 2000-01 season phei hi chu Manchester United-a a awm chhunga a season hman ropui ber ṭum a tih theih. League khelh 28 ah goal 11 thunin, a pumpuiin competition hrang hrangah khelh 42 ah inlanin goal 16 lai a thun nghe nghe a ni. Beckham hian tun hmaa a hmingchhiatna zawng zawngte chu a khuh chiang hle a ni.
HLIAMPUI TUARIN A RUM VE TA!! :
April ni 10, 2002 zanah Manchester United leh Deportive La Coruna te chuan UCL match khelin, he match hi Beckham-a tan chuan theihnghilh theih a ni tawh lo vang. He inkhelah hian Beckham-a chuan a second 'metatarsal' ruh ti tliakin khawvela ke na lar ber a tih theih hial. Hemi tuma Beckham-a tinatu Argentine Aldo Duscher hian a tihpalh ni lovin a tum reng vanga tilui niin British Media-te phei chuan an sawi nghe nghe a ni. He inhliamna hian Beckham-a tan harsatna tam tak siam sak bawk mahse, Manchester United-a a pawimawh zia tilangtu a ni thung a ni. Hemi season hian Manchester United chuan Premier League titile la zo lovin European cup-ah pawh Bayern Leverkusen in an hnawtchhuak nghe nghe a ni. Beckham hian hliam a tawrh lai pawh hian ala hlawh hnem hle a, khatih hun laia khawvela footballer hlawh hnem ber, a ni nghe nghe a ni.
HUN HARSA A HMACHHAWN LEH TA!! :
Hliamin hun rei tak a tlakbuak avangin Beckham hian United-a a hmun ngai awh lawk thei lovin Ole Gunnar Soskjaer chu a hmun ruak awmhkhattuah Alex-a chuan a hmang fo ta mai a. Hei hian Alex-a leh an inkara khi awm chu a zauh hret hret zel a. February 15, 2003 a Arsenal FA Cup-a an hnehloh tumin dressing room-ah Alex-a chuan chhuata ball boot awm chu pet sawkin Beckham-a mit koah tak a han fuh a, thui ngai hialin a kak ta a. Beckham-a hian khawih let lemlo mahse a mit a hliam awm chu khawlaiah lenpuiin, mipui leh chanchinbumite hmuh ngei turin a pholang ta a. Hemi tuma thil thleng hi United fans-te tan chuan a lungchhiatthlak hlein a rinawm. Beckham nge chhuak ang Alex? tih chu Khawvel football fans te titi lian ber a ni chho ta a ni.
MADRID KHAWPUI LAM PANIN A PEM CHHUAK TA! :
Kum 2003 nipui transfer alo inher chhuah meuh chuan, Beckham chuan dawrtu a ngah ta kher mai. FC Barcelona zawm tur angin thu thang mahse, team ropui dinthar leh tum Real Madrid chuan £ mtd 25 in an lei chhuak ta a ni. Real Madrid-a a season hmasaberah hian Copa Del Rey ah runners-up nih puiin vanduaithlak takin Champions league nomawi erawh a chawipui thei ta lo a ni. Mahse, vanneihthlak takin Spanish Super Cup erawh a lakpui thei hram thung. 2005-06 season-ah pawh Real Madrid chu Spanish Premier league-ah runners-up bawk nih puiin UCL ah pawh round of 16 ah an tla nghe nghe a ni.
2006-07 season ah Real chuan President thar hnuaiah an ngaih em em, Spanish league title chu an la leh a, hemi tum hian Beckham hian a thawhhlawk hle a ni. Beckham hian Real Madrid-a a cham chhung hian cup ropui tak tak lakpui lo mahse a hming a chher chhunzam zel a, Basketball player ‘Michael Jordan’ a jersey no. 23 chu khawvela nambar mawi berte zinga mi ni turin a hmingthanpui nghe nghe a ni.
Forbes magazine-in a tarlan dan chuan Real hian Beckham-a vang hian sum leh pai lamah hlawkna an tel nasa hle a, US$600 million lai an bungraw hralhna atangin an tel niin a tarlang. Hei hian Beckham-a mipuiin in an ngainat zia a tilang chiang hle awm e.
LOS ANGELES GALAXY LAMAH :
July 2007-ah Beckham chu LA Galaxy Home Depot Centre ah mipui 5,000 chuang leh Accredited Media 700 lai hmaah lawmluh a ni a, US-ah pawh boruak ala ngah kher mai. Beckham-a hian khelmual a rah hma hauhin a jersey chu fans tam takin an lo hak khalh hman der tawh a ni. Beckham hian Galaxy tana a game hmasa ber hi Chelsea FC nen friendly match an khelh tumin a khel a, minit 78-naah a rawn lut a ni. A vanglai a pel deuh hret tawh bawk nen, Galaxy-ah hian sawi deuh chiam thamin a khel ropui hran lova, mahse fans te inkhelh en ti chaktu ber ala ni reng a ni. Beckham hian LA Galaxy-ah hian kum tin $6.5 million a hlawh a ni.
MILAN LAMAH LOAN IN :
Beckham hian England national team tana khelh leh a chak thu sawiin, January 2009 khan he a beiseina ti nung thar leh tur hian upate tana khawvel football kawngkhar hawnsaktu AC Milan ah loan a kal tir a ni a, Milan ah hian Christian Vieri a jersey no hlui ‘32’ a ha nghe nghe a ni. Beckham hian Milan-ah hian a thiamthil ala theihnghilh loh zia a lantir leh a ni ber a, a game hmasa Khelh 4 ah goal 2 lai khungin assist a nei nual bawk a, LA Galaxy fans ten an awt leh ta kher mai. Italian media lam chuan Beckham-a chu Milan-ah a cham hlen tawh dawn ni te'n an chhuah a, amah Beckham-a ngei pawhin Milan-a a khelh chuan England squad-ah tel thiehna chance a pe thei dawn tih hriain, Milan-a cham zui a duhthu a sawi lang ve a ni. Mahse, LA Galaxy lam hian Golden Boy hi chhuahtir mai chu an lo phal bik awzawng lova, a man ah $10-15 million lai lo chhiarin hei hian Beckham a neih hlen tuma Milan beiseina chu a ti tawp ta a ni.
LA GALAXY LAMAH A KIR LEH TA :
Beckham Galaxy-a a kir leh hnu hian fans ho chuan a chunga an lungawiloh thu leh an huat zia an lo tilang chiam mai a, poster ah ‘Go home fraud’ tihte leh ‘Part time player’ tihte an lo tar hial a ni. Mahse, he season-ah hian Beckham-a hian a club hi a chetthatpui hle a, Western Conference final (2009) a an champion theih nana player thawhhlawk berte zinga mi a ni nghe nghe a ni.
MILAN AH BAWK LOAN IN A KAL LEH :
January 2010 ah a vawi hnih na'n Beckham-a chuan Milan kawr ha lehin February ni 16 ah Manchester United a chhuahsan hnua a hmasa berna atan San Siro ah Manchester United alo mikhual nghe nghe a ni. He inkhelah hian Milan chu 3-2 in an tlawm nghe nghe a ni. Milan-a a vawi hnihna atan a a kir leh hian a kein kum tam fe alo rah tawh loh, Old Trafford chu a rah leh phah ta a, hei hi atan chuan thil lawmawm tak a ni ngeiin a rinawm. He inkhelah hian Beckham-a hi a khel chhelo hle a, mahse inkhelha chungnung zawk, Manchester United chu 4-0 in an chak leh ta a ni. Inkhel a zo chiah tihin Beckham chu green and gold scarf (he scarf hi anti-Glazer symbol a fans ten an hman a ni) a awrh lai hmuh a ni a, heihi Manchester United fans pakhatin Glazer chhungkaw dodal na'na a pek a ni nghe nghe a ni.
Beckham-a hi September ni 11, 2010 ah LA Galaxy-ah bawk kir lehin kum 2012 thleng a awm a ni.
PARIS ST. GERMAIN LAMAH :
January ni 31-ah Beckham chuan khawvel barakhaihin French milian, PSG tana khel turin thla 5 daih contract a ziak! Mi tam tak chuan sum leh pai um vanga lut niah an ngai a, mahse, Beckham-a chuan sawiseltute chu tawngkam ni lovin thiltihin a chhang keuh mai. PSG-a a hlawh zawng zawngte hi mi rethei(naupang) tan a hlan vek a ni.
He hmunah hian Beckham chuan record dang siam lehin, PSG chu Ligue 1 title a lak pui a, English zinga league 4 a champion medal awrh thei hmasa ber a ni ta a ni.
KHELMUAL PAWN LAMAH :
Beckham hi kum 2005 ah UNICEF Goodwill ambassador atan ruat a ni a, naupangte hmasawnna atana theihtawp chhuah thin mi a ni. Tin, Beckham hi Olympic Games 2012 kha London in a thlen theih na'na theihtawp lo chhuahtu a ni . Beckham hian Los Angeles-ah leh London-ahte Football academy neiin khawvel a football academy hmingthang berte zinga mi a ni nghe nghe. A nupui Victoria Beckham chuan fapa 3 leh fanu 1 hrin sakin an hmingah Brooklyn Joseph Beckham (1999), Romeo James Beckham (2002), Cruz David Beckham (2005) leh Harper Seven Beckham (2011) te an sa a ni. Beckham-a hian a ban veilamah Hindi tawng ngeiin tattoo a chhu kalh mai a, he tattoo awmzia hi ‘Vichtoria’ tihna a ni. A taksa pum deuh thoah tattoos neiin, a vaiin tunah hian tattoos 20 lai a nei a ni. Heng a bana tattoos-te khuh na'n hian Beckham-a hian inkhelhnaah kawr bantluan deuh hlir a ha thin a ni.
Beckham-a hian chanchin ziah sen loh ngaihnawm tak tak a nei a, heng tehi avai maia ziah chhuah vek chakawm hle mahse, tun tum atan chuan hemi chinah hian ka lo duhtawk hrih phawt mai a nge. Tin, Beckham hian chanchin mawilo tak tak nei ve thin bawk mahse, footballer-te zingah chuan a entawntlak ber te zinga mi a niin ka hria.
No comments:
Post a Comment