KING ERIC CANTONA

Football i ngaina tak meuh anih chuan ‘KING ERIC’ hi I hriat a rinawm a. Manchester United Football Club history mai nilo football khawvela chuai tura rinawm loh Eric Cantona hian football a chawlhsan tawh a, mahse football a khelh laiin sulhnu ngaihnawm tak tak a hnutchhiah. A bultanna chu goalkeeper a ni a, mahse khawvelin kan hriatdan chu forward a ni thung. A thinchhiat vangin a lar a, chu chu khelmualah pawh a lantir fo, mahse team tan player tangkai a ni tho bawk.

Kum 1966 May ni 24 khan France rama Marseille-ah a lo piang a, a pianpui hming chu Éric Daniel Pierre Cantona tih a ni deuh duah. Apa chu nurse leh rawng hnawih thiam Albert Cantona niin anu chu thawnhnaw cheilam thiam Éléonore Raurich a ni thung. An unau hi pathum niin Cantona hi an milai a ni. Mipa vek an ni a, a unaute chu amah aia kum li a upa Jean-Marie leh amah aia thla sawm leh pasariha naupang Joël-te an ni.

Kum 14 mi anih chuan SO Caillolais-ah a khel a , Cantona hian a pa hnung zuiin a tirah chuan keeper-ah a khel thin a, mahse a thiamna lantir zelin a tawlh hma tial tial a forward tha takah a chhuak zui ta a ni. Kum 1980 leh kum 1981 inkar khan SO Caillolais-ah hian a awm a, game 200 chuang teh meuh a khel hman.

Cantona-a'n professional club a neih hmasak ber chu Auxerre a ni a, kum 1983–1988 inkar khan khelin game 82 khelin goal 23 a thun. Auxerre-a a awmlai hian kum 1985-86 inkar khan loan-in Martigues-ah a khel a game 15 khelin goal 4 a thun hman bawk. Auxerre-ah hian professional contract hu kum 1986 khan a ziak chauh a, a khel tha thei hle a ram tan pawh rinrawl ni chho tura ngaih nghal a ni. Mahse a mize tha lo intanna ni turin kum 1987 khan a team mate Bruno Martini chu a hmaihah a hnek. Hemi hnu pawh hian buaina neuh neuh a nei zauh zauh a France senior team-ah an koh loh phah fo. Mahse kum 1988 U-21 European Championship-a France U-21 an champion tum khan Cantona hi a khel ve a, quarter-final-a England under-21 an hneh tumin hat-trick a siam.

A chet that chhoh em avang chuan a club tan em em Marseille chuan kum 1981 khan  French record fee (FF22m) ni turin an lei. Kum 1989 January thla a Torpedo Moscow nen an inkhelh tumin mipui lamah ball a pet vak a, hemi hnu hian an thlak avangin a thinrim chuan a kawr phelhin a pawt vak a leiah a paih a Marseille chuan thla kht an hrem. Hemi hnu rei lo te hnu hian TV lamah France national coach Henri Michel chu a sawisel chiam mai bawk a, kum khat chhung international match khel thei lo turin hrem leh a ni. Buaina a ngha em avangin Cantona chu thla ruk chhung atan loan-in Bordeaux-ah an chhuahtir a, hemi hnu hian Montpellier lamah kum khat chhung loan thovin an chhuahtir leh. Montpellier-ah pawh hian a mize ngai a pu lut thova a team-mate Jean-Claude Lemoult nen insualin Lemoult hmaiah ballboot-in a vawm. A chetdan vang hian Montpellier player paruk chuan Cantona hi ban turin an club hotu te an ngen tawp. Mahse a team-mate tha tak tak Laurent Blanc leh Carlos Valderrama-te duhsakna zarah an hnawtchhuak ta lova ni sawm chhung an club groun-a inkhel thei lovin an hrem. Cantona hi sual viau mahse khelhah a tha si a French Cup-ah Montpelier hi a champion pui hnuin Marseille chuan an kokir.

Marseille hi French Division 1 (Ligue 1 ni ta)-ah a champion pui leh a mahse kum 1991 khan Nimes hnenah an hralh ta tho. Kum 1989 khan loan-a a khelhna Bordeaux tan game 11 khelin goal 6 a thun hman a. Montpellier-ah khan 1989-90 season awmin game 33 a khel hman a goal 10 a khung hman bawk. A khel chhe ngailo, mahse a mize mawilo vangin a buai zing hle thung.

Nimes-a a khelh lai December thla tir lam 1991 khan Cantona hian referee chu ball-in a vawm a French Football Federation chuan thlakhat chhung inkhel thei lo turin an hrem a, in sawifiah tura an tih laiin French Football Federation hruaitute chu 'Mi mawl' a tih avangin thla hnih hrem belh a ni. Kum 1991 December ni 16 khan football a chawlhsan thu a puang. Hetih hunlai a French national team coach chu Michel Platini a ni a, Cantona fan a ni. Platini hian Cantona chu kohkir tumin nasa takin a thlem a, Cantona enkawltu (psychoanalyst) Gérard Houllier chuan thurawn pein England lama nun bul tan tha leh turin a ti a hei hi Cantona chuan pawmin England lamah a kal.

Kum 1991 November ni 6-a England-a an thlen tirhin Michel Platini chuan Liverpool manager Graeme Souness hnenah Cantona hi a zawrh a, mahse Souness chuan an forward neihsa Ian Rush, John Barnes, Dean Saunders leh Ronny Rosenthal-te mai bakah Paul Stewart leh Nigel Clough an lakluh dawn avangin a hnar. Kum 1992 Janury thla khan Cantona chuan Sheffield Wednesday-ah trial a nei leh a mahse Wenesday-ah hian lut duh lovin Leeds United lama luh a thlang ta zawk a ni. Leeds United hian £900,000-in an lei.

Leeds United-ah hian a che tha viau a. A luh kum season (1991-92) hian Football League First Division (tuna Premier league kan tih hi)-ah a champion pui nghal. Leeds United tan hian game 59 khel hmanin goal 9 a khung hman.

Kum khat vel awrh Leeds United-a a khelh hnuin Manchester United chuan kum 1992 November thla khan  £1.2 million sengin an lalut a, hetih hunlai hian Manchester United hian striker an nei mumal lo hle a Manchester United manager Sir Alex Ferguson chuan Cantona hi ring ngamin a lalut. A luhtirh chuan a che tha nghal bik lova mahse Manchester United hmatawng neihsa Dion Dublin chuan hlaim a neih avangin a inkhel thein lova, Brian McClair leh Mark Hughes-te an che tha vak bawk silo nen Cantona chu rinrawl a ni chho ta. Goal khung nghal mai lo mahse a thiante tan a tangkai thei hle a, Manchester United tan a goal hmasa ber chu kum 1992 December ni 19 khan Stamford Bridge-a Chelsea nen 1-1 a an in hnehtawk tumin a thun.

England-ah hian in siamthat tuma lut ni mahse a mize duhawm loh tak kha a bansan thei lova, Elland Road-a a club hlui Leeds United leh Manchester United inkhelh tumin Leeds fan pakhat chu vhil a chhah khum pek a FA chuan £1,000 an chawitir. Manchester United-a a luh kum khatna ah hian point 10-a hmahruai chungin  Premier League-ah an champion. Kum 1993–94 season-ah pawh Manchester United chu Premier League-ah an champion zui leh a, FA Cup final-ah Chelsea 4-0 a hnehin an champion bawk. He FA Cup final-ah hian Cantona chuan penalty atangin goal hnih a khung nghe nghe. Kum 1993–94 season atang hian Manchester United jersey number 7 a ha tan.

Kum 1994–95 season-ah pawh champion thei dinhmunah Manchester United chu a din pui leh a, mahse pawi a khawih leh ta. Kum 1995 January ni 25-a Crystal Palace nen an inkhelh tumin Palace defender Richard Shaw chu a tlawh lui a red card pek a ni. Shaw hian Cantona jersey a pawh vang a ni. Khelmual a chhuahsanna lamah Crystal Palace fan Matthew Simmons chu a 'kick' leh a, hei hi Cantona chanchin sawi apianga sawi tel ve ziah ngai chu a ni. Crystal Palace fan Matthew Simmons hian Cantona chhuak tur a awmna chu a thutna atanga chhukin, "Mawla France ramah kir rawh, France ram mi lak tlakloh," tiin alo au el a, hei hi Cantona chuan palzam mai lovin a 'kick' ta a ni. A chetdan vang hian Manchester United chuan thla li chhung inkhel thei lo turin an hrem bakah kar hnih hlawh an chawitir, FA pawhin thla riat chhung an hrem bakah £30,000 an chawitir ve bawk.

He a 'Kungfu show' hi a hlawkpui lo hle a, France national team captain anih na chu hlihsak anih mai bakah France ram tana khel turin an ko zui lo. Kum 1994-45 season-ah hian Blackburn Rovers chu Premier League-ah an champion. Mahse Cantona erawh chuan a 'Kungfu show' hi a hun tawna nuam ber anih thu a sawi.

Hremna a tawrh hnua a game hmasa ber chu kum 1995 October ni khat khan Liverpool an hmachhawn tumin a khel a, penalty atanga goal khat thunin 2-2 in an in draw. Kum 1995–96 season-ah hian Premier League leh FA Cup-ah an champion kawp a, FA Cup final-ah hian Manchester United captain ni lai Steve bruce chu a inhliam vangin a khel thei lova Cantona chu captain-ah Sir Alex-a'n a hmang. He FA Cup-ah hian 1-0 in an chak a, goal awmchhun hi Cantona thun a ni.

Kum 1996–97 season-ah Premier League chawi leh a, Steve Bruce-a'n Birmingham City a pan tak avangin Manchester United captain atan Cantona hi hman a ni. Hemi season tawp hian kum 30 mi niin football a chawlhsan thu a puang a, Manchester United-ah season nga a awm chhungin League Nomawi pali a lakpui hman. Manchester United tan hian game 143 a khel a, goal 64 a thun hman a ni.

Manchester United a chhuahsan hnu hian Cantona chu beach football lamah a in hmang zui a, French national beach football team captain a ni pha leh. Kum 2005 FIFA Beach Soccer World Cup , Rio de Janeiro-in a thlen tu khan France team enkawlin a champion pui a, kum 2006 FIFA Beach Soccer World Cup-ah khan French national team enkawl lehin pathumna anih pui leh bawk a ni.

Kum 2011 khan football-ah kirin  New York Cosmos-ah Director of Soccer-in a lut. Cantona hian Isabelle Ferrer nen innei fa pahnih Raphael (kum 1988-a piang) leh Josephine (kum 1995-a piang) an nei a, mahse inthen tawhin tunah hian lemchan thiam Rachida Brakni nen an innei mek. Cantona unaupa Joël pawh kha professional footballer tho niin Olympique de Marseille, Újpesti TE leh Stockport County-ah te a khel kual hman a, football chawlhsanin lemchan lamah a kal ta thung. Cantona cousin Sacha Opinel pawh footballer niin tunah hian Harlow Town (Southern League Premier Division club)-ah a khel mek bawk a ni.

Eric Cantona hian football a khelh chhungin red card a hmu hman nual a, hrem a tawk nasa hle bawk. Player tha tak ni si in World Cup vawikhat mah a khel lo te hi a uiawm hle a, a mize tha lo bansan hmak thei se chuan a thleng sang leh zualin a rinawm.