Rosario, Santa Fe province hi Argentina khawpui Buenos Aires atanga mel 175 vela hlaa awm a ni, chu tah chuan Pitar pakhat a awm. A hming anpui fanu, mi in tifaia inhlawh thin Celia (María Cuccittini) a nei, a makpa hming chu Jorge Horacio Messi a ni, ani hi Company pakhata Barbed wire department - a Supervisor hna thawk a ni. Celia leh Jorge Messi te nupa hian fa pali, mipa pathum leh hmeichhia pakhat an nei, mipa zinga a tlum ber chu Lionel Andrés Messi Cuccittini a ni, chhungkaw khawsak harsa ve tak an ni.
Football lawm khua tih takah pa ber, Jorge pawh hian a hunawl neih karah naupang inkhel tur a kawikhawm thin a, a fapa tlum ber Lionel Messi pawh a ute ang thoa Football lawm niin kum hnih mi lek a nih lai atang tawhin puana hlawm Ball a pet a pet tawh thin a ni. An khuaah hian naupang tournament siam an uar hle a, naupang Football khel thiam zawng peih zinga langsar ber pawl chu, an thenawm putar Salvador Aparicio a ni.
Kum 1991 alo inherchhuak, Lionel Messi pawh kum 4 mi alo ni veta, a thiante zingah te bik ni mah se Football thiamna mak danglam bik tak nei a ni, chutia an chhungkuaa Football thiamna mak danglam tak nei alo awm takah chuan Pi ber, Celia chu a ngawi mai mai thei talo! An khaw Club, Grandoli enkawltu leh an thenawmpa ni bawk, Salvador Aparicio bulah a kal a, a tupa chanchin chu hrilhin a inkhel zir chiang turin a sawm ta!
Lionel Messi chuan hneh taka ball chhai kualin bang a pet per vel, a che vel chuan Aparacio mit a tlun ngei mai! An inah lengin a nu bulah chuan an fapa chu an Team zawm tir phalsak turin a ngen; mahse, a nu chuan a thiante zinga te fal bik lutuk a fapa chu an tih palh a hlauh bakah zirna lama hlawhtling tura a beisei avangin inkhelh a rem tilo! Chu tah Pi ber alo lang ta, ani chuan a fanu bulah chuan an tupa chu thiamna danglam tak nei niin a inkhel ngei tur a ni a ti bur mai le! Pi ber thu a tlang ta!
Lionel Messi a inkhel chho veta, thiante zinga a te ber ni mah se mak tak maiin mi a bum zung zung a, a tlan pel a, a pet Goal ta deuh reng mai! A thiam dan mak tak mai chuan sawi a hlawh chho hle a, kum 1995 khan Argentina Club hlun, Newell's Old Boys chuan chher hriam zel turin an lalut ta a ni.
BUAINA :-
Lionel Messi thiamna mak danglam tak chuan mipui a hip hle a, a inkhel en chaka ticket lei an pung hluai bawk! Pate thiamna mak danglam tak nei a nih avanga "The Dwarf" tia an koh laiin buaina chhumpui alo zing ta tlat mai le! Kum 11 mi a nihin Lionel Messi chuan than theih lohna natna chi khat a nei tih hriat chhuah a ni, enkawl vat a nih loh chuan atan a pawi thei dawn!
An chhungkua an buai ta! In Jection nan thla khatah $1000 atanga $1500 vel thleng sen a ngai. Newell's Old Boys lamin a inenkawl nan $ 500 vel bak (www.ZoFooty.com by - Lalhma Chhuana) sen an inhuam silo, Buaina belhchhah turin Argentina sum dinhmun tlakhniam lai alo ni ve bawk nen Pa ber, Jorge Messi thawhchhuahin a tlin lo! Beiseina sang tak nena a thlir, a fapa tlum ber Lionel Messi enkawlna tur leh an chhungkaw chawmna tur daih a thawkchhuak zolo a ni!
Argentina Club lian dang River Plate anlo lang, Lionel Messi an duh takzet! Mahse, Buaina ngai tho, a inenkawlna senso tum an huam lo! Jorge Messi tan kawng dang dap a ngai, a fapa enkawl huamtu Cub a zawn a ngai!
Khawvela Club ropui ber pawla chhiar, Barcelona anlo lang ta nawlh mai! An Sporting Director, Carlos Rexach chuan Lionel Messi chanchin chu alo hria, trial nei tura rem siampuiin Messi te pafa chuan Barcelona an pan ta rup mai le! Beisei angin thil a kal vek lo, natna khirh tak vei, pate bawk si tan khawvel huap pawha Club ropui ber pawla chhal, Barcelona Academy (La Masia) a luh hi thil awlsam a ni hauh lo vang le!
Jorge Messi -a'n a fapa tan Barcelona thuneitute a tah ngen!Trial(www.ZoFooty.com by - Lalhma Chhuana) an han nei a, uluk lehzualin kar hnih chhung an endik leh, chutah Lionel Messi thiamna chuan Barcelona thuneitute a hneh ta, a inenkawlna senso zawng zawng tum huamin khawvela Player tha ber ber pawla chhiar - Pep Guardiola, Xavi Hernadez ect te lo zir chhuah tawhna, "La Masia" ah ngei man chuan an ziak lut ve ta a ni.
An chhungkaw tan hlimna kawl a eng veta! An chhungkaw hnuk, an fapa Lionel Messi -a'n khawvela Football Academy tha ber pawla ngaih "La Masia' a zawm mai a nilo, a inenkawlna senso zawng zawng pawh Barcelona hian an tum sak vek dawn a nih chu!
Tumruhna nen Lionel Messi-a'n a bei fat fat, Cesc Fabregas, Gerrard Pique te nen dawhkan khat kilin "La Masia" ah inkhelh an zir ho, a thiam ber pawl a ni chho zat zat a, Senior Team tana a inlan hma hauhin "New Maradona" tiin an sawi der tawh a ni! 16th October, 2004 khan kum 17 leh ni 114 chauha upa niin Frank Raajkard-a hnuaiah La Liga -a a Game hmasa ber a khel a ni.
A bak zawng chu khawvela Footballer piang tawh zinga ropui ber pawla chhal tawh tur, a inkhel ropui tak kan hmuh thin, kan hmuh mek leh kan la hmuh fo tur, Khawvela Footballer tha bera an thlan nawn awn awn Lionel Messi chanchin ropui leh lawmawm lam a ni tawh e!
(Mahni pianna/thisen ram kalsana ram dang tana khela hlawhtling tak tak an awm nual! Lionel Messi hi Spain a seilian niin Spain tana khel thei ni mah se a thisen/pianna ram, Argentina tan khelh a thlang. A tih fuh leh tih fuh loh chu mimal ngaihdan a ni tawh ang)
"Kapi kha awm lose tun dinhmun hi ka thleng hauh lo vang, kapi vanga hlawhtlinna chang thei chauh ka ni. Hma thlir thui tak min neihpuiin inkhelh min phalsak a, hmangaih takin min enkawl a. Ka hlawhtlinna hmu hman lovin min liam san mah se, ka pet Goal - a van lam hawia ka kut pahnih ka phar chhoh hian van lam atangin min lo hmu anga, min lawmpui ve ngei ka ring tlat a ni. Tin, malsawmna tinrenga min vurtu Pathian chungah pawh ka lawm em em bawk a ni"
- Lionel Messi
(Api hi kum 1998 khan a boral tawh a ni)
No comments:
Post a Comment