MIZO PASTOR HMASA BER

Rev Chhuahkhama hi East Phaileng khuaah kum 1885 khan a piang a, a pa chu Parova a ni. Parova hi khawlhring hnam a ni a, Pasaltha, Ramvachal a nih avangin Parova hi Phaileng khuaah hian a lar ve hle thin. Hetianga ramchhuah atchilh tak anih avang hian in lamah pawh awm tam lovin ramhnuai lamah a tal tam hle a, engmah hian a ramchhuak tur an thulh tir thei lo. Mahse Chhuahkhama a pian dawn tuk erawh hi chuan Parova pawh hian ramchhuah a lo tum vek tawh chu a thulh phah a, chuvang chuan a fapa lo piang hmingah pawh

‘Ramchhuahkhama’ tih a phuah ta a, mahse a hnuah ‘Ram’ tih hi pawihin ‘ Chhuahkhama' tih chu a pu hlen ta a ni.

Chhuahkhama te khua hi Vailian in an haldarh tak avangin Pawibawiha fapa Thangkhama khaw din thar Sekaihah an insawn a, hemi hnu hian Patkhuihah kaiin reilote hnuah Tualbungah an insawn leh a. Heta tang hian Lungpherah an kai leh ta a ni.

Chhuahkhama chu kum 15 mi vel anihin eizawnna kawng dap turin Aizawl-ah a thianpa Darnghaka nen a pa hriat lohin an kal ru ta a. Hetih hunlai hian Gurkhali Sipai hovin Mizo naupangte chu bel nawt atan an chhawr thin a, naupang thenkhat chuan belnawta inhlawh chung hian lehkha an zir thin a, Chhuahkhama pawh hian sipai belnawt chunga lehkhazir chu a chak leh Aizawl a kal chhan ber chu a ni.

A tum ang ngei chuan Sipai bel nawta inhlawh chungin lehkha chu a zir ta a. Kum 1903-a Mizorama lehkha zir hmasate tana Lower Primary Exam hmasa berah pawh telin tha takin a pass nghe nghe. Chhuahkhama hi mi nungchang tha leh lehkha thiam thei tak mai a ni a, hetih hunlaia sap te pawhin Chhuahkhama hi an duh hle a, Kristian tha takah an siam zui ta a ni. Hetih hunlai hian Assam Chief Commisioner chhu Aizawl-ah a lokal a, sikul pawh a tlawh a, sikul naupang nungchang tha ber hnenah lawmman a pek duh thu sawiin zirtirtute chuan mipa lamah Chhuahkhama leh hmeichhe lamah Saii te an thlangchhuak a, Chief Commissioner chuan an pahnih chuan Tangkapui a pe ve ve a, Mizo zinga tangkapui hmu hmasa ber a ni.

Lower Primary a pass hlim hian Chhuahkhama hi a tlangval ve uaih tawh a, tlangval hmeltha tak mai leh sam nalh bawk si, Assam hruaitu luber hmelhriat tham ni bawk si a nih avangin mi pawhin an ngaisang hle. Kum 1906-ah Upper Primary a exam leh a, chu pawh chu tha takin a passed leh ta. Upper Primary a passed hnu chuan Mission Sikul Inspector-in reilote a ruai a, mahse Major Cole-an hna pek a tiam avangin kum 1907 khan Aizawl leh Lunglei inkarah Dak Overseer hna a thawk ta a ni.

Chhuahkhama hi Lower Primary a zirlai atang tawha Kristian tha tak anih avangin Dak Overseer hna thawka Aizawl leh Lunglei inkar a kar tawn zak zak lai pawh hian a zinchhuah changa a riahna khua apiangah Pathian thu a sawi thin a, a thusawi ngaihthlak duh vang pawh ni loin a hmelthat em avangin a bawr huai huai thin. Nula ho pawhin an star thei em em a, a hmelthat avangin thlemna tam tak a tawk a, mahse Pathian thu awih tak anih avangin tuman an thlem thlu zo lo.

Kum 1908-ah Sialsuk-ah an sawn a, heta tanga a hna thawk tura tih a ni. Rei vak lo a thawh hnu chuan nuam a ti vak lo ngeni ban a tum ta a. A bang tur chu Major Cole a chuan a ui em em a, hna dang pawh ngaituah sak zui a intiam hial a. Hetih rual hian Pu Zosaphluia khan Cherra-a Pathianthu zir turin a lo thlem ve mek bawk a, tichuan kum 1909 khan sawrkar hna chu a bansan ta a ni.

Hetia a ban hnu lawk atanh hian Zosaphluia hnuaiah Personal Clerk angin a thawk chhunzawm a. Tumkhat chu amah duhsak em emtu Bawrhsap Cole-a chuan Pu Zosaphluia fapa nen an leng dun lai a hmu a, “Babu hna thawk turin ka ti che a, Saphluia nau awma tan i duh zawk a ni maw?” tiin a chhuahchhal hial a. Mahse Cherra atanga a lo chhuah hnuin kawngah Major Cole-a nen hian an intawk leh a, “Tlangval sual tlanbvo tum mai emaw inih ka ti a, mahse thil ropui tak thawh tum i ni tih ka hre ta, ka lawm hle mai, ” tiin Bawrhsap Cole-a chuan a fak ta thung a ni.

Cherra-ah: Zosaphluia hnuaia a thawh hnuin kum 1910 February thlaah Chhuahkhama chu Cherra-ah Pathian thu zir turin a kal ta a, Mizo, Cherra-a Pathian thu zir tura kal hmasa ber anih avang chuan Sap leh Khasi ho pawn an lo lawm hle mai. A hming chu Khasi hovin lam harsa an tih avangin C. Khama tiin an ziak a, Khama tih hlirin an ko thin. Cherra-ah hian tha takin a zira, kum 1912-ah a zirlai chu a zirzo ta a ni.

A zir zawh hnu hian hna hrang hrang a thawk chhunzawm a, tichuan kum 1913 Presbyterian khawmpuiah Mizo zinga Pastor hmasa ber ni turin Ordained a ni ta a, amah ordain tu chu Khasi Assembly aiawha lokal Welsh Missionary Rev Ceredig Evans-a niin Lunglei atanga kal Pu Buanga’n (Rev J.H. Lorrain) fuihna thuchah a sawi bawk a ni.

Hetih hunlai hian Pastor tyih hming hi Mizoten an la hre lo va, ‘Sap aiawh thei’ tiin an sawi mai thin. Hetianga ‘Sap aiawh thei’ a lo nih takah chuan mipuiin an ngaisang a, Kristian leh Kristian la ni ve lo chenin an ngai ropui em em a ni.Kum 1914 atangin Bial nei loin ram pumah a tulna apiangah rawngbawlin a zinkual thin a, Baptisma chantir te a lo tul tawh avangin kum 1914 chhung ringawt pawh hian mi engemawzah a baptist a ni. Hemi kum vek, February 26, 1914 hian nupui a nei a, a nupui chu Hauteii (Hauthangpuii) niin kum 20 mi ani a, hetih lai hian Chhuahkhama hi kum 27 mi a ni. Hauteii nen hian fa 11 lai an nei a, a upa berin a sen laiin a thihsan a, midang erawh an puitling vek a ni. Hauteii hi nu fel tak anih bakah Rev. Chhuahkhama hian a kaihruai thiam hle a, a rawngbawlnaah tanpuitu tha tak a ni. A bial mite an lo lanin, a tana hriat harsa si, hriat loh zahthlak theih bawk si hunah te hian, a nupui chuan, “Khawia awm leh tute nge in nih kha?” a lo ti hlauh thin a. An han insawi tan chuan ani chuan a lo man nghal mai a, hre takin a be chhunzawm thei a. Anni chuan, “Kan Pastor makzia hi chu aw, keini khual lam hlate pawh hi min hre em em zel a,” an ti hial thin a ni.

Zosaphluia leh Chhuahkhama: Han let leh lawk ila. Zosaphluian Rev Chhuahkhama a hmuhchhuah dan hi ngaihnawm ve mai mai tak a ni. Saphluia sikulah chuan Chhuahkhama chu a rawn kal ve a, naupang te a ni a, tawngtai lai hian midang zawng zawng kun nghiaia an maimitchhin laiin Chhuahkhama chu a meng tlat mai pek a. Chu chu Zosaphluia’n a hmuh fuh a, Sikul banah chuan a office ah a ko ta a, a zawt a, Chhuahkhama chuan, “Ka pa hi puithiam a ni a, Kristian ka ni lo va, kristiante tawngtainaah ka maimit chhin ve a thiang lo, chuvanga meng ka ni, ” tiin tlang takin a hrilh hmiah mai a, Saphluia chuan chutianga naupang ze danglam tak leh rilru nghet tak mai chu Pathian tan mi pawimawh tak leh tangkai tak a la ni thei dawn a ni, a ti a, a hnehah chuan ” Isua Krista chuan hna ropui tak thawk turin a duh che a ni” a ti ta zawk a, a hau lo va, duat taka enkawlin a theih tawpin a kaihruai a, Mizo zinga pastor nemngheh hmasa ber Chhuahkhama chu Mizo Kristian te tan Kohhran BAN pawimawh ber a lo ni ta a ni.

Kum 1914 hian Tirhkoh exam neih a ni a, he exam-a tling mi pali Phawka, Vanchhunga, Hauchhunga leh Thangkhuma te chu October, 1914 khan ordained niin Mizoramah chuan Pastor panga an lo awm ta. Tichuan heng Pastor panga te bial chan tur hi khawmpui chuan a rel felsak ta a, Phawka’n Tlawng ral thlanglam zawng a chang a, Hauchhunga’n Sialsuk atanga chhim chhak Champhai kawng achin chhim lam Tuichang thlang lam zawng a chang a, Thangkhuma’n Tuirial chhak lam, Champhai lamlian achin hmar lam zawng a chang ve thung a, Vanchhunga’n Tuichang ral chhak lam zawng a chang ve bawk a, Rev Chhuahkhama pawh chuan Tuirial leh Tlawng inkar, Aizawl achin hmar lam zawng a chang ta bawk a ni.

Chumi atang chuan Rev Chhuahkhama pawn bial hran a nei ve ta. A bial chu zau ber lo mahse Aizawl khawpui a chan tel avangin a ropui bera sawi theih a ni. Aizawlah chuan mi lian leh ropui an lo tam a, chungte chuan hotu enin an en a, zah a kai hle. Aizawlah hian Mission sap pahnih Sandia Sap leh Zosaphluia te an awm avangin Aizawl aiin a a bial hmundang a ngaihtuah a, hetih hunlaia Pastor te zingah Bial fan taima pawl tak a ni. Heng avangte hian a hlawh a lo tam deuh bik ngeni tumkhat chu Tirhkoh Phaisama leh tirhkoh dangten Saphluia hnenah hlawh pun an dil a, Pu Phaisama chu Pu Saphluia betu berah an hmang a,

“Ka pu, Chhuahkhama pawh cheng sawm in hlawh tir a, engati nge keini hi cheng thum chauh min hlawh tir?” , tiin a han sawi a. Pu Saphluia chuan,

“Well, Chhuahkhama chu Cherra-ah a zir alawm, a hlawh pawh a tam ang chu” a ti a. Phaisama chuan, “Peter-a te pawh Cherra-ah an zir hleinem, Chhuahkhama hi a hlawh a tam si, kan zinna ah te zin ve ṭhin sela” tiin a chhang niin an sawi thin.

Heng Pastor hmasa te pawh hian hotu enin an en deuh reng reng bawk a, bial fanga an zin report pawh ahnenah hian an pe thin ni awm tak a ni. Tumkhat chu Dokhama’n Pastor Chhuahkhama (1885-1949) hnenah a zin thu a va report ti hian a va report a, “Ka pu, tun ṭum ka zin chu inkhawmnaah thu ka sawi zel a. Inkhawm bana inkawmkhawmnaah Pathian thu ṭhenkhat min zawt ṭhin a, ka thiam ang angin ka chhang ve ṭhina, ka lawm ve viau asin” a va ti a.

“Engte nge an lo zawh che?” a lo ti a.

“Min lo zawh pakhat chu, paradis hi eng nge maw ni le?” tih te hi. Rev Chhuahkhama chuan “Engtin nge i chhan?” tiin a zawt a, Dokhama chuan “ A…Paradis chu thlai chi khat, chawhmeha hman chi ani awm e ”, ka ti a” tiin a chhang a, Pastor Chhuahkhama chu a nui teuh teuh e, an ti.

A mizia: Rev Chhuahkhama hi mi ropui a tling a, Zofate zingah hmasa ber nihna a ngah hle bawk. Lower Primary Pass hmasa ber, Upper pass hmasa ber, Tangkapui hmu hmasa ber, Dak Overseer hmasa ber, Sikul Inspector hmasa ber, Theological College kal hmasa ber, Pastor hmasa ber a ni hial a n. Amah hi fing tak, hawihhawm thiam tak, mi zah der thiam si anih avangin hotu dangte pawhin an zah let a, kalkawngah tu pawh tawk sela “Khawi lamah nge?” ti tala be lo chuan a kal pel mai mai ngai lo. A in vawng up thiam em em a, hei vang hian sap ho pawh khan an ngaisang a, Sandia Sap-in an rama Mizo Kristiante chanchin a report naah pawh Rev Chhuahkhama hi “Refined Christian Spirit” tiin a sawi nghe nghe a ni.

Amah hi mi thiam, inpe bawk si ani a, a mawng a zangin a viak a tha a, hei vang hian khawmpui rorel nikhuaah te pawh a thu paihthla zo an awm mang ngai lo a, sap ho pawhin Mizo chungchanga an biak rawn ber a ni reng thin a ni. A nungchang a thain a hmel a tha bawk a niang tum khat chu a Bial chhunga a len velnaah, in pakhatah hian a lut a. thutna pindanah chuan naupang a lo thu a; ani pawh chu a thu ve a. Naupang chuan tu tih a hre lo va; a hmel a enin a zahawmin a thianghlim si. Chokaah a lut a, a nu hnenah, “Ka nu, saw, tu emaw kan inah a lut a, a zahawmin a thianghlim si, Pathian a ni ang,” a ti hial a ni. Khaw pakhata Sacrament a buatsaih lai chu mi pakhat hian, ‘Van mi hmel a pu’ a ti hial bawk.

Rev Chhuahkhama hi mi thiam hmasa tih takah kawng hrang hrangah sulsutu a lo ni a. Kum 1935-a Pi Zaii bangla-a Young Lushai Association (YMA) din anih pawh khan a dintu zingah telin Committee Member zingah a tel a, Competition Sub Committee-ah member a ni bawk. Mizo Bible lehlin a nih pawh khan mi tangkai tak niin Ephesi leh Thesalonika Lehkhathawn hrilhfiahtu zinga mi a ni.

Tin, hla lehlin lamah a inhmang viau bawk a, Mizorama kohhran hlabu lar ber Kristian Hlabu-a hla tha tak tak engemawzat hi a lehlin niin chungte chu KHB No 131, 135, 172, 173, 228, 244, 324, 361, 389, 405 leh 543 te an ni. Hetia Pastor hna a thawh paha rawngbawlna kawng hrang hranga inhmang chung hian Tlangau Bu a enkawl thin a, Aijal Theological School ah a zirtir bawk thin a ni.

Hun tawpna: Rev Chhuahkhama hian sulhnu ropui tak tak a nei a, a zavai chuan kan sawi seng awm lo ve. Kum 36 chhung zet rinawm taka Pastor hna a thawh chhungin mi 4634 zet a Baptist a, nupa tuak 748 a inneihtir bawk. Tichuan, kum 1949 February ni 16 khan kum 65 mi niin a thi a, a thih ni thleng hian Kohhran pa ber anih avangin a ruang chu ropui takin Mission Veng Biak in tualah phum a ni ta a ni.

AN SAWI ZAITHIAM BUIZOVA

Buizova hi Chawngtui hnam niin Tan tlang chhuah lampanga Chawngtui hmuna an awm laia (AD 1710 vel) hming chher tan a ni.Hmeithai fa a ni a,pate lam hmelchhe tak a ni.Buizova hi a zaithiamin mi hneh thei hle mahse a zai loh lai chuan tumah a bulah an awm duh lova,a bialnu 2 te pawn pasal an neihsan a,a nun hi a khawngaihthlakin,a mal ngawih2 reng a ni.N.Vanlaiphah bulahte,Hmuifang tlangahte,Reiek leh E.Phailengahte an insuanzel a ni.A zaithiam avanga sunhlu hnah til leh Ngawi dawh an kham hialte kha chu kan hriat kha.

Selesih SANGSARIH vanglaia awm a ni a. A zai hi a tlawk tha hle ni a sawi a ni. A zaithiam zia sawi nan” Buizova a han zai meuh chuan Sunhlu hnahte hi a til er er mai a ni,” tih te, Tuipui ngáwi an dawh a, Buizova chuan, “Luiah lengngha suarah kandan a, Thahnimi runah ka dang zo lo”. tih hi an sa ta mai a, patling pui pui hian lung lian pui pui pu er ur chung hian, “Buizo zai suh,” an ti a, an lunglenglutuk hian meng tuau mai a ni, ti tein an sawi. “Buizova a han zai meuh chuan Tuipui luang lai te pawh hi achawl dut dut mai ani,” ti tein an la sawi zel nia! Buizova a zaidawn chuan vawn tur tha tawk neih a ngai an ti thin a ni awm e. Buizova nu hian Buizova zaithiam dan hi a lo la hre lova, loa an fehna ah chuan a zaitir ta a. Buizovachuan ruahtham loh hla, “Ka vauva thuvate, i hràm lai bang teh aw Keipawh Lalngo ngaia ka tah ni tam e” a han ti chu loa feh zawng zawng chu an tlu ta dual mai a, a nu ber pawh chu atlu ta a, A zukkaih thawh dawn chuan a nu chuan ‘E, Taite,min duh tak2 lovang’a lo tie an tih chu. A zaithiam zia an sawi dan hi an uar lutuk pawh a ni maithei.A bak hria chuan thawh belh ru….

RUNGDIL CHANCHIN(Mizoram Dil zinga Pakhat)

Tu tute emaw ziak ka chhiar kual nual mai a, ka lo chhinchhiah dan angin, a tlangpui ka'n khaikawm ve leh mai ang e.

Rungdil hi Aizawl district-a awm Suangpuilawn khua atangin 14 km vela hlaa awm a ni a. A Area zau zawng hi 2.5 hectares vel a ni. Rungdil tih hi Varung tamna Dil "Lake of partridge" tihna a ni a. A chhan chu, He hmunah hian Varung a tam hle a ni. Dil pawh hi pahnih niin, Dil leh dil inkarah hian hmun awl tlem a awm ve bawk a ni. Dilah chuan Mai, a lai taka phel, a phel lehlam chu dil pakhat zawka an thlak chuan, an thlak lohna lam zawkah a rawn lang chhuak thin a. hei vang hian, tui hnuai chhungrilah a inpawh ngei niin an ngai. Dil chhehvel hi thing duah tha tak tropical evergreen deciduous forests an tih chuan a hual vel mup mai a ni. Rungdil hi Suangpuilawn khaw hmarthlag lam, East Phaileng, Suangpuilawn leh Tuivawl inkara awm a ni.

Chiang zawkin i en teh ang u le...

A len zawng (width) leh thuk zawng (depth) chu chiag fek fawkin hriat a ni hran lo va, A lian zawk hi hlam 300 vela lian niin, hlam 5 vela thuk a ni. A te zawk chu hlam 200 vel a ni a, chuag zeta ni a, a kamsir vel hi dumin a hual vel vek a ni. Rungdil lian zawk chhaka Suangpuilawn lam kawngpui bulah chuan, Awng (hole) thuk lutuk, a thuk zawng pawh hriat loh a awm bawk. Chutah chuan thil engamemaw an thlak chhin chuan, Rungdilah a lo langchhuak daih thin a, chuvangchuan, Rungdil nen inpawhin an ngai thin a ni.

Chu lei kawrawng (awng) atang chuan, Thlasikah khu a chhuak nguah nguah thin a, 'A Thaw' an ti mai thin. Chu Awng (hole) chu hman lai Pasaltha pakhatin luhchhuah a tum a, rei ve tak a zuk lut vang vang tanmk naa, a thim luattuk avangin, a lo letleh ta ngawt mai a ni. Awng awmna atanga chhak lam tlanga thingte chu a ro hle mai thin a. khu chhuakina a ur ro niin an ngai bawk a, Tlang pawh chu Khurchhe ur tlang an ti. mahse, tunah chuan Pialtlep an ti leh ta a ni.

Thawnthu atanga a lan danin, Suangpuilawn chhak lam, Khawlian kawng bul lawka kawngthlag lamah, Bualdil nen an awmho thin a ni. Ramsa hliam, Bual dila lut reng reng chu man theih an ni tawh ngai meuh lo a, hliam tuarte chuan damna atan an hmang niin an sawi. Bualdil chuan, Ramsa hliam ka hnena lo kalte chu ka lo tidam zel ang a ti a. Rungdil erawhin, Ramsa hliam ka hnena lo kalte chu ka chhuah ngai lo ang a ti ve thung a. ngaihdan inkalh avang chuan an inep ta hle mai a. A thusawi ang ngeiin Rung dila ramsa hliam lutte chu an chhuak leh tawh ngai lo tih Bualdil-in a hmuh takah chuan, aw le, awmdun thei kan ni tawh lo, hmun dangah insawn rawh a ti ta a. Rungdil chu a thinrim ta hle a. thinrim lantir nan a khu ta nguai nguai mai a. Chu chu Bualdil-in a hmuh veleh, insawn chhuak vat turin a ti ta a.

Tichuan, Rungdil nupa chu an chhuak ta a. Suangpuilawn tlanga chhovin, tlang liam thla lehin, hmarthlang lam panin an kal ta a. Tuivawl thlen hma chiah chu awm nan an it ta a, an va pan ta a. kawng a awih deuh avangin, Rahbi an siam zel a, Chu chu Lung Rahbi tih a ni. chung lai vel ram chu Lung Rahbi Ram tiin an sawi bawk. Tah chuan an awm nghet ve ta a. chulai vel chu ngaw dur pui pui a ni.

Thawnthu dang lehah chuan, Rungdil lian zawk leh te zawkah hian, pa pakhatin Mangkhawng a kam a. A en apiangin, Varung leh ramsa dang a lo delh ziah thin a ni. Zan khat chu le, a mumangah, a mangkhawng kam chu sut turin an lo hrilh a. Amaherawchu, sut phal der lo mai a, vawi khat leh chauh tiin a kam zel a. Ni khat chu, a Mangkhawng a va en leh chuan, naute ban a lo delh a. Ngaihtha lo deuh chungin a haw a. In a thlen chuan, a fa chu a lo thi reng mai a ni. Chuta tang chuan le, Rungdil hian huai a nei tiin an hlau ta hle mai a. Rungdil lian zawk chu engemaw chang hian thisen anga sen kulh a awm thin a, Thi a nei (period) an ti ve mai thin a ni. aw le, hriattur chu, Dil lian zawk chu A nu (female) an ti a, Dil te zawk hi a pa (male) an ti a ni. Dil tui chunglangah patek a zam chhuak vek a, patek chuan insawn chang a nei thin a, thil mak ve tak a ni! Kum 1983 khan, sorkara Fisheries department chuan Dilah hian Sangha a dah a, 17Kg atanga 20 kg laia liante an ni thei thin a ni.

BUIZOVA ZAINA

Pi pute hun laia zaithiam ber a an sawi thin, Buizova hi chawngtui hnam a ni a. Chawngtuiho hi Mizo hnam peng hrang hrang zinga thlang tla hmasa pawl an ni a, an unau Chawngzo ho te nen thlang an tla rual a ni.A tet lai pawn a hmelchhiat em avangin a tual chaipui naupang ho chuan an chhaih nawmnah thin hle a, an kawm tha duh mang lova ni.Naupang chenbeh tak a nih bak ah pate kher khawr tak mai a la ni zui. Chubakah hmeithai fa a la ni leh zel a.A hmel chhiat em vang hian thian kawm tur pawh a nei ngai mang lova, thing delh loh lung delh loh ni ta fam chu a rawn tleirawl chhuak ve ta a. Tleirawl ti eng leh mar nalh pawh nei chuang hek lo, mite fiamthu thawhna leh kam chhe tleuhna ber a rawn ni chho zel ta tho va. Chung hunl;ai chuan a zaithiamzia chu an lo hre tan ta a, a zaithiamzia hi sawiin a siak lo va, a zai hian mi hip theihna mak danglam tak mai a nei a, a zai ri hre phak tawh phawt chuan ngaithla lovin an chhuah phal ngai lo, an thinlung chhungah hian thingthu ang maiin a muh hian a mut veng veng mai thin a ni.
Buizova a zai dawn chuan vawn tur tha tawk tak neih lawk hi a ngai ngei thin a, vawn tur nei lo va ngaihthlak mai mai chi a ni lo.A zai khan mi a hneh em em thin avangin thate hi a zawi zo vek a, an tlu ruai mai thin a ni an ti. Zaithiamin a zaiin mite hneh thei hle mah sela, a hmelchhiat em avang hian nulate chuan an lungten tlat zel a. Han ngaizawngin han duh ve deuh dawn hial thin mah se a hmel mawlh mai hian a tibam leh thin. A zai erawh tumah hian an ngaithla kham thei lo va, a hmel erawh tuman an hmu peih lo a ni ber mai.
Buizova zaithiamzia chu miten sawi huai huai thin mah sela, a nu chuan a awi duh tlat lo va, ‘Chuti takin Buia hi a zaithiam hlei lawng nge, miten an hmuhsit em avang hian tihnawmnah nan mai mai an sawi thin a ni ang,’ a ti tlat thin a. Vawi khat chu Buizova lawm rawih niin Buizova nu chu a feh ve a, lo an han thleng a, an bung dawn ta a. Buizova nu chuan, “E, Buia, miten i zaithiam thu hi an sawi an sawi a, i zai lah chu ka la hre ve ngai si lo va, tun tum chu i zaithiamzia ka hre ve duh tlat mai,” a ti ta a. Buizova lah chu a zai mai duh bik lo va, chutah le, a nu chuan, “I zai hma chu ka bung lovang,” a ti ta tlat a.
Buizova chu zai turin a inbuatsaih ta a, a lawmte ho chuan tih danglamin an awm leh dawn tih an hriat lawk avangin thingbul vawn tur remchang an hmuh ang angte chu an vuan ta ran hlawm a. Buizova nu chu thingbul rem chang vuan ve tur in an ti a, nimahsela a vuan ve duh chuang lo va. Chutah le, Buizova chu a rum tan ta der der a, zai tuma an hmm...hmm.. lai chuan an vau a thing tang ro chherawpah chuan thuro hi a rawn fu chat a, a rawn hram ta kar kar a, Buizova chuan thuro chu thlir chungin ruahtham loh hla a rawn chham chhuak a, a hla thluk pakhat nilen zai thlukin an sa ta mai a !!
“Ka vauva thuvate, i hram lai bang teh aw,
Kei pawh Lalngo ngaia ka tah ni tam e,”
a han ti ta mai a. Chutah le, a lawmte ho lah chu an tha a zawi zo va, thingbul vuanin an thuding zawi ngiai hlawm a, chakna reng nei lo ang mai hian Buizova zai lai chu an thlir a. Chutihlai chuan Buizova nu chu thingbul vuan a tanhmun te lo siam lawk ve hek lo, a tha han zawi thut kha inveng hman hek lo le, a lum ta a. Lo lah chu a awi ang reng si a, lo mawng thleng rawkin a lum ta a. A pawnfente lah chu a tla hrang rem rum a, Buizova chuan hmanhmawh takin a nu lum chu a umzui a, a pawnfente chu a chhar a, a nu bul a zu thlen chuan, “Ka nu, ka nu, eng nge i an , i na em ?” tih pahin a nu pawnfente chu a pe a. A nu chuan eng danga chhang lovin a pawnfen chu fen that mawlh mawlh pah hian Buizova banah chuan a vuan a, “Buia, kei ni angte chu min duh ve awm si lo va,” a lo ti a. Buizova chuan mak tih hmel takin a nu chu a en a, “Duh leh duh loh han sawi tur em ni kan nih le, i dam a, na i neih loh chuan tirawh, thlam lamah i chho vat teh ang khai, kan thiante ho pawh an lo hrilhhai rei lutuk ang e,” a ti a. Tichuan, Buizova nu chuan a fapa zaithiamzia chu a lo hre ve ta a.
Chawngtui atang chuan Buizova te chhungkua pawh mi tam zawk te hnung zuiin thlang an rawn tla ve ta zel a, Hmuifang tlang Chawngtui hmunah te, Reiekah te, E.Phailengah te a rawn awm thla zel a, hla te a phuah zel bawk a. A lo upat deuh hnu chuan a zai tlem ve tial tial a. A hun tawp lama a zai miten an sawi reh theih loh pakhat chu, E.Phaileng khaw bulah hian vawikhat chu Buizova lungleng hi sunhlu kungah a lawn a, duhthawh tak maiin a zai rum ta hlerh hlerh mai a, a zai chuan thlifim a ko va, thli a rawn thaw ta her her mai a, sunhlu hnah chu a rawn chhem til ta er er mai a ni.

He sunhlu kung hi hmuhtheih hnuhnung ber niin, tuna mi ho khi a zung puakkeh atanga awm an ni tawh hlawm ani.