AMBUSH IN THE SKIES

Israeli Air Force in War of Attrition

_ _ _ 1967 Six Days War ah Israeli Defence Force te chuan hnehna chiang zetin in an chang a, ni ruk chhung lekin an mahni beihrawn tu Egypt, Syria leh Jordan ramte hnehin Israel ram let thum zet a zau Sinai Peninsula, West Bank leh Golan Height te a chhuhsak hman bawk anih kha. Khawvel mithmuha mualphona nasa tak an han chang kha Egypt President Jamal Abdel Nasser-a zak leh thinrim bawk si leh Sinai Peninsula a hlauh bawk nen engti kawng zawng pawh a Sinai Peninsula tal laklet leh dan ngaihtuah in a thiantha Soviet Union hnenah tanpuina theihtawpa tah awhin a han dil a, Russia chuan lo khawngaihin a ralthuam neih tha ber ber te leh instructors, operators leh mithiam rual tam tak chu Egypt khawpui Cairo ah a thawn lut ta chur chur mai a.

_ _ _ Israeli Military Intellegence te chuan chona thar an hmachhawn ta tlat mai le, hetih hunlai a Israel Intelligence branch te inbiak pawhna tawng hman hi Arabic vek a nih avangin hetia Russia a lo inrawlh takah chuan an zinga Russian tawng thiam tlemte mi 34 lek te chu communication and intelligence centre Sinai ah thawn in Unit thar code name 'Masrega' (knitting needle) an din nghal chuk chuk a, anni hian Egypt a awm Russian Intelligence ho thuruk inthawn vel ngaithlak hna an thawk nghal ani.

_ _ _ April 18, 1970 ah Israeli Air Force 69th Squadron a mi F-4 Phantom fighter pahnih te chu Egypt ramchhung thuk takah thlawk lutin reconnaisance mission an nei a, an mission nei zo thlawk haw leh lampang Israel in a awp chin Sinai Peninsula an rawn kan lai velin Israel Intelligence branch 'Masrega' te chuan an thu ngaihthlak rukna atangin Egypt Jet fighter Mig21 pahnih in F-4 Phantom te hi rawn um in a pilot te chuan Russian tawng an hmang tih an hre ta hlauh mai a, Israel sipai leh political leader te an buai ta nak mai, heihi Russia hian ralthuam mai nilo pilot thlengin a tir lut ani tih an hriat vawikhatna ani.

USA in McDonnell Douglas F-4 Phantoms fighter jet Israel a pek hnu hian Israel hi vansangah a chungnung em em a chhun zan zawmin Egypt ramchhung duh lai lai an bomb mawlh mawlh tawh mai si a chumi counter nan a March 1970 a Russia in Mig-21 Squadron thum lai mai Cairo, Alexandria leh Aswan-a a dah na chhan leh a pilot te hial indona a a rawn chhawpchhuah tak na chhan chu ani.

_ _ _ Russia a in rawlh thuk ru hle tih an hriat hian Russia leh zel han beih chu tha dawn lova a hriat avangin Defence Minister, Moshe Dayan chuan Egypt ram chhung ril tak tak a aerial reconnaisance operation neih chu a ti tawp ta vat a. Mahse Russian pilot ho an awm hle hle thei tlat lo, 20th July,1970 ah Israeli Skyhawk fighter pali patrolling te chu an fighter chungnung leh tuantha fe zawk Mig-21 in an um a pakhat phei chu an kap chhe nghe nghe a,

_ _ _ Israeli Prime Minister nu rothap Golda Meir-i beng an thleng zet chu a dan adang ta zar mai, IAF Hqrs ah Russian fighters te chu zilh nghal turin green light pe ta rap mai le! IAF operation branch te chu an thluak pu ber leh vansang inbeihna a ralrel thiam hmingthang David Porath-a hovin an thu khawm nghal chuk chuk a, vansanga Russian Mig21 fighter te lo ambush dan tur an rel a, an ambush plan hi pawmpui a ni chiah a- Israeli pilot chhuanvawr leh tha ber ber te chu ko khawm in an chet lak dan tur an hrilh hre ta nghal a. July 30, 1970 tlailam her hret ah Arab Air Force thlawhna 67 zet an kahthlak hnu a a dang belh leh ngei tum in an thlawk chhuak ta chur chur mai le

Stage 1:

69th Squadron a F4 Phantom Jet fighter te chu Ramat, David Airbase atanga thlawk chhuak in Suez khawpui chhimchhak lama Egyptian radar post te chu an bei ta nghal a, he radar post an beih ah hian Phantom F4 attack formation hmang lovin Russian hovin an zuam em em A4 Skyhawk fighter (he fighter hi chuan Mig21 te chu khan lo tak ani) attack formation an hmang thung a, Russian pilot te tan chuan Skyhawk fighter emaw ti a nuam sakhai a han chhaih kual vel a chakawm ngawt ang le.

Stage 2:

119 Squadron ami French kutchhuak Mirage IIIC pali te chu Tel-Nof Airbase atanga thlawk chhuak in hniam takah leihrut lo chauhin an thlawk a, Egyptian airspace an lut chiah a thlawhna pakhat anga a lang turin a in hnaih thei ang berin an in bawhthuah a vansang tak- 35,000 feet a sang ah an in vawrh chho daih a, hetia vansang taka an awm hi Egyptian radar chuan thlawhna pakhat reconnaisance aircraft enthlak hna thawk angin a lo hmu a.

Stage 3:

113 Squadron atang Mirage IIIC pahnih chu Ramat-David Airbase atangin an thlawk chhuak a, anni pahnih erawh Suez channel chhak lam a tlangdung hniamte te phen ah inbeih tan hma zawng thlawk kual thlawk kualin an lo biru ve thung bawk a.

Stage 4:

Mirage pilot tha chungchuang pahnih te erawh Rephidim Airbase, Sinai Peninsula a IAF Airbase lianber leh Suez channel hnaih berah inkau sa ran in an cockpit an la thu mek a- anni pahnih hi chu standby a dah an ni thung. Mirage fighter sawm rual te hi 20mm machine gun bakah AIM-9 Sidewinder air-to-air missiles pahnih theuh a thuam niin Phantom te hi AIM-7 Sparrow radar homing missiles leh maching gun a thuam an ni thung.

AMBUSH:

IAF ten Egyptian radar post an beih atanga Minute 11 lekah Soviet MiG21 sawmparuk lai Russian pilot te khalh ngei mai chu pali zelin quartet formation a thlawkin an rawn thleng phei chawpchilh nghal a, MiG21 pariat te chu radar base beitu Israel A4 Skyhawk fighter emaw an tih bei turin an thlawk hrang a, a dang pariat te chuan vansang 35,000 feet a reconnaisance aircraft pakhat chauh emaw an tih han kap thla turin an in vawrh chho ve nghal bawk a. MiG21 te Israel position atanga 20Kms an rawn thleng chiah a, IAF commander Moti Hod chuan a stop-watch chu hmet tawpin attacking order a pe a, order pek annih rual chiah in Phantom fighter pali te khan Skyhawk fighting formation chu thlak thut in Phantom F4 fighter tha chungchuang te chu vansang lamah an in vawrh chho thut a. Hemi rual chiah hian vansang a MirageIIIC pali in bawhthuah tlat te kha thlawk darh in an hmelma te hmachhawn turin an in siamrem ta nghal a. An ruang chaicheh thlakna an rawn thleng chiah tih ah Soviet pilot te chuan Mirage fighter pariat in an hualbet tlat tih an in hre chauh a. An chunglam atangin Phantom F4 pali in duh ang thal a nuam in an rawn chhuk beih ta bawk nen Soviet pilot, experience nei lem lo chu an talbuai nghal reng a. Chu chu Israeli pilot dogfight expert rual- ralhrat tak tak te chuan an hual beh chhungah an han chhaih kual ta a ni.

_ _ _ Abraham Shalmon a MirageIIIC thla dinglam chu a phe zawk a Sidewinder AIM-9D missile rawn dawk zawk chuan MiG21 pakhat talbuai chu va deng puak nghalin a pilot nen an darh hneh hle. Hemi rual deuh thaw hian chunglam atangin chiang tawkin Asher Shir a Mirage atanga Sidewinder rawn thlawk chhuak chuan a hnuaia MiG21 lai takah chuan a zu fuh ve nghal zat bawk a, a pilot hi in eject hman mahse hliam a tuar hman nge lei a thlen in a thi hman tho a.

Mirage lam an che rang deuh, reilo te ah MiG pahnih an kapthla hman der.

Aviam Sela Phantom F4 thla veilam ve thung a de zawk a Sparrow missile rawn ving phei thiak chuan MiG21pakhat chu a va kap bung hmawk a, a pilot hi in eject hman in him takin lei a thleng thung.

_ _ _ Avihu Ben-Nun, Phantom Hammer squadron commander chuan Mirage pahnih in MiG pakhat lei hrut deuh thaw a hniam a an um chiam chu a hmu a, Mirage pahnih te hian an sidewinder an hman zawh tawh avangin hnaih takah um a, an 20mm machine gun hmanga kahthlak an tum a. An hnung atang chuan ani in a AIM-7 Sparrow missile in chu MiG chu a lo va kahthlak sak nghal a.

_ _ _ An ruang chaicheh thlak atanga thlawh chhuah tum MiG pakhat chu Abraham Salmon-a bawk chuan a um leh ta. Shalmon hian a missile a hmang zo tawh a machine gun hmang thei tur tawka hnaia um tumin a bei a. Soviet pilot lah beidawng hlauthawng thinrim kahthlak hlau bawk si leh missile in a lock ang tih hlau in a thlawk kawi zawk zawk a kahthlak a har phian. Hetih lai hian Mirage pahnih standby a an dah te kha an lo thleng phei ve chiah bawk a. Yiftach Specktor, 101st Squadron commander chuan a sidewinder pahnih chu a rualin a kapchhuak nghal a pakhat zawkin a va fuh a mahse a tla mai lo, khu vut vut in khawthlang lam a pan a chu chu Shalmona'n a 20mm machine gun in hnai set sawt ah a phuh hrep a, a tla ve leh ta tho a.

Israeli fighter te fuel in a daih dawn ta lo tih a hriat avangin an commander Moti Hod chuan disengagement order a pe chhuak a an kir san ta a ni.

_ _ _ Israeli Air Force te hian MiG21 panga kapthla tura an hun hman chhung hi minute 2 chiah !!!!

War of Attrition chhung hian Arab thlawhna 111 leh Israel thlawhna 4 kahthlak a ni a. He ambush thlen atanga ni riatna ah War of Attrition chu ceasefire hmanga tihtawp ani ta a ni.

Khawvela la thleng ngailo vansanga jet fighter in ambush na awmchhun leh dogfight hmuhnawm ber ni a hahipa a hmutu ten an sawi 'Ambush in the skies' chu A TAWP TAMS

LAL ISUA I ZUI AVANGIN

By; Upa C. Ngurthantluanga

1. Lal Isua i zui avangin hlawkna dawn tum vak kher suh, I zui Isua kha i hlawkna a ni sa reng tawh a ni, a dang zawng chu ama kutah nghat mai rawh.

2. Lal Isua i zui avang khan miten mifel hmuhin an hmu nghal ngawt dawn lo che a, i zui Isua kha i felna a nih tawh avangin, felna kawngah a hruai mai zawk dawn che a ni.

3. Lal Isua i zui avangin in buaina te kha a fel duak dawn kher dawn lo va, Buaina in a tih buai ve phak loh nun thuhruk i chhungah a dah tawh zawk dawn a ni.

4. Lal Isua i zui avangin i natna te kha a dam nghal vek kher dawn lo a, I zui Isua kha na reng chung pawha damna a ni zawk a ni.

5. Lal Isua i zui avangin thil tam tak chan/hloh tur nei mahla, i zui Isuaah chuan i la neih ngai loh thil tam tak neih belh tur i nei zawk a ni.

6. Lal Isua i zui avangin mite fak beisei kher lo la, i zui Isua chu fak mai la, nang pawh miten an sawisel reng hauh lo ang che.

7. Lal Isua i zui avangin thlemna ten an tlansan dawn lo che a, i zui Isua kha thlemna hnehna tur a ni zawk a ni.

8. Lal Isua i zui avangin lawm reng turah in ngai lo la, i zui Isua kha mahni chauh pawha him taka awmtir thei tu che a ni zawk a ni.

9. Lal Isua i zui avangin harsatna, hrehawmna engpawh i tuar a nih chuan lawm takin Lalpa fak la, fakna thiltih theih zia i hmu mai ang.

Iluminati chanchin

Tunhnaiah thalaite zingah Illuminati leh Music Industry-a sulhnu an neih dan chungchang a rawn lar hluai a. Hemi chungchang hi ziak turin ngenna ka dawng nual a, mahse thil controversial tak anih avangin fimkhur tak leh hriatthiam awl zawngin kan tarlang ang a, Sawikim vek sen anih loh avang leh thil inzawm buaichuar tak anih avangin kimchang tak erawh chuan kan tarlang thei awm lo ve.

Enge Illuminati?: Iluminati te hi an awm tak tak leh tak tak lohah inhnialna a na sa hle a. Ngaihruatna mai mai leh an awm tak tak ring lo tam tak an awm. Chutih laiin history kan thlir chuan Bavarian Illuminati kan hmu a. Luciferian Society nena inzawm tlat he Bavarian Illuminati hi kum zabi 17-na a Enlightenment Era laiin May 1, 1776-a German Philosopher Adam Weishaupt-a’n a ruk tawpkhawka a din pawl pakhat, Europe-a lal rorelna hrang hrang leh sakhaw bik neihte paih thla tura phiarruk hna thawktu pawl a ni. Mahse he Order of Illuminati hi Karl Theodor, Bavaria Elector chuan kum 1784 khan a tih tawp sak ta a ni. Kum zabi 17-na laia Weishaupt-a Bavaran Illuminati tih tawp sak a nih hnuin mi thiltithei leh thluak tha, hausa tak tak te chuan a ruk tawpkhawka pawl dinin khawvel pum hi rorelna pakhat hnuaia kun tir a, ram hrang hranga sawrkarte tlukchhiat tira Illuminati member ten an awpbeh khawvel thar NEW WORLD ORDER (NWO) siam chu an tum ber a ni. America ramin Independence an hmuh theihna te, Vietnam War etc te a sum lama vurtu investors lian a ruka inzawm Freemasons ho nen pawh a ruk taka inzawmna nei a sawi a ni. He NWO siam tur hian khawvela Bank zawng zawng inthlunzawm tira pawisa inang hman a, zirna in, sumdawnna leh media zawng zawng controll a sakhaw hrang hrang, abik takin Kristian sakhua tlukchhiat tir chu an tum niin sawi a ni a, mi lar tak tak Winston Churchill, The Bush Family, leh The Rothschilds te kha Illuminati member niin sawi an ni thin. Sakawlh te nen pawh an rinzawn hial thin.

Illuminati chungchang hi mi thiam tak tak te pawhin sawichian tur em em an hre thin lo. A ruk taka khawvel awpbet thei tura phiarru a, a ruk thei ang ber a inhmukhawm a che thin niin sawi a ni a, khawvel politics a an inhnamhnawih dan te, chhiatna hrang hrang a an inphumruk dan te chu chipchiarin kan sawi hman lovang. Mahse, tunlai thalaite ngaihven, hlimhlawp thil chinchhuahna bulpui Music Industry-a an sulhnu erawh Kristian thalaite tana a pawimawh avangin kimchang lo takin han bih zuai ila.

Illuminati te hian milar leh zaithiam lar tak tak te chu sum leh pai leh hmingthanna hmanga vurin an member te pawhin Illuminati sign hi a ruk thei ang berin an lantir thin a, tin, an hla thuah te pawh hian Setana fakna thu tam tak an zep ru thin. Heng hi hetia enliam mai chuan kan hmu thiam lova, mahse uluk taka en erawh chuan Illuminati symbol hi music video tam takah hian a lo inphum ru niin sawi a ni.

Illuminati symbol: Illuminati te hian an chhinchhiahna hi mit lawnga hmuh nghal mai theih loh, uluk taka bihchian erawh a hriat theih siin hmun tinrengah an zep ru thiam hle a, zirchiangtu thenkhat phei chuan Illuminati hian kan khawvel nitin nun hi kan hriatloh hlanin min controll a, an symbol pawh hi a ruk takin hmun tam takah a in phum ru niin an sawi.

Illuminati ho symbol chu han sawi fiah dawn ila- Illuminati te symbol-a mit hi Lucifer mit entirna a ni a, hei hian engkim a hmu thei (all seeing) a, Pyramid chhungah dah a ni. Pyramid chu a chhip a zuih a, a hnuailam a arh ang hian rorelna pakhat hnuaiah engkim kun tir tumna a lantir a ni. Tichuan Illuminati symbol chu Pyramid (triangle) chhunga Mit pakhat awm (Eye of Horus), a lem ami ang hi a ni. Hetiang lem hi building design hrang hrang te, company logo-ah te, music video leh fashion designer te kutchhuakah te leh US Dollar-ah ngei pawh hmuh tur a awm a ni. Tin, Illuminati te hian Kristian sakhua tlukchhiat tira anmahni malsawmtu Setana lalram din an tum tel bawk avangin Pyramid chhunga mit lem awm ‘Eye of Horus’ bakah hian Kel luruh ro lem, Pentagram etc te hi a rukin an chhinchhiahna atan an hmang bawk niin sawi a ni.

Illuminati leh MusicIndustry: A chunga kan sawi tak Illuminati pawl te hian kan nitin nunah nasa takin an inrawlh a, an chhinchhiahna hrang hrangte chu a rukin tam tak kawng hrang hrangin hmun hrang hrangah an phumru tel tawh a ni. An lal ram zauhna atana an hmanraw tangkai ber pakhat chu Music Industry leh Hollywood khu niin Illuminati chungchang zirchiangtute chuan an sawi. Illuminati te hian Setana chu Pathian aiin a ropui zawk niin an ngai kan tih tawh kha, chumi avang chuan Music Industry leh a behbawmah pawh hian Illuminati te hian an thuhnuaia an dah tawh zaithiam te music video-ah an chhinchhiahna hrang hrang Illuminati symbol te, kel lu ruh ro te, pentagram te, checker board (a dum leh a var) te, ni pathian lem etc te an lan tir nual hlawm a ni.

Tunlai thalai ten heng zaithiam Jay-Z, Beyonce, Rihanna, Lady Gaga, Katy Perry, Bob Dylan, Eminem etc te hi kan ngainain an hla pawh kan ngaithla tam hle mai. Heng zaithiam te hi Illuminati pawl nena inzawmna nei a sawi lar ber an ni. Illuminati Agent te hian zaithiam chu hmun nuam takah inhmuh falna hun an siam pui a, chutah chuan sum leh pai, nula hmeltha, larna leh hlawhtlinna etc hmangin zaithiam te chu an pawla lut turin an thlem thin niin an sawi a. Chutianga an pawl zawm tate chuan a ruk takin Setana an bia a, Setana pawhin Illuminati pawl kaltlangin nasa takin mal a sawm thin ni a sawi a ni. Setana hian a malsawmna chu ruah ang maiin a sur tir ni a heng zaithiam te hian an hriat avangin an hla thu tam takah malsawmna ruah anga sur tirtu Setana chu ‘Rain Man’ tiin an hla thu tam takah an tarlang a, pawisa ruah ang maia a sur vel pawh engmah hrethiam chiang lovin music video tam takah kan en liam mai thin awm e. Heng hian awmzia a nei a ni.

Rapper lar Jay Z hi Illuminati nena sawi zawm lar ber a ni a, a thawmhnaw siamchhuah (clothing line) Rockafella hi Illuminati nena inzawm Freemansons member mi hausa tawntaw Rockfeller Family hming sawina niin an sawi a, he clothing line logo pawh hi Illuminati sign (All seeing Eye-Engkim hmuthei Mit) ang kha a ni. Tin a thawmhnaw design dang Rocawear sign-ah pawh hian mit lem (Eye of Horus) chei danglam a hmang a ni. Jay Z hi Illuminati member ni a sawi a nih angin chumi tichiang tur chuan Alicia Keys nen an hla lar tak ‘Empire State of Mind’ ah pawh khan “Jesus can’t save you, life starts when the church ends” (Isua’n a chhandam thei lo che, Nunna chu kohhran tawp hunah a in tan chiah dawn) tiin a lo chham zuah zuah tawh a, amah malsawmtu Rain Man hming hi Rihanna nen an hla lar tak ‘Umbrella’ leh hla dangah te pawh a lo chham tel tawh a ni. Chutiang bawkin Beyonce Knowles pawh hi Illuminati member ni a sawi a ni a, tunhnaiaa album hming ‘I am Sasha Fierce’-a ‘Sasha Fierce pawh hi ramhuaiin a awpbeh hnua a hming niin sawi a ni. Tin, tunhnai maiah pawh Illuminati te symbol ‘Kel luruh ro’ lemchuanga cheiranin thla a lak bakah Kel luruh ro (Baphomet) zungbun a bun lai thla tihlananih chei chuai bawk kha. Tin, tunlai Pop music-a lar em em Lady Gaga pawh hi Illuminati nena inzawm nia sawi a ni bawk. Ani pawh hian Kristian sakhua tibawrhbang zawngin music video a siam fo a, tin a video thenkhatah Kel luruh ro a khum lai te, ki lem vuaha a inchei te, ‘All Seeing Eye’ awmna kawr a hak te tam tak hmun tur a awm a ni.

Tin, Eminem pawh hian a hla thu tam takah Setana fakna leh amah chenchilhtu a chhungrilah a awm tih a chham chhuak a, ‘Rain Man’ chungchang pawh hi a hla thuah hmuh tur tam tak a awm. Hetiang deuh bawk hian zaithiam lar tam tak chuan lar leh hmingthanna, sum leh pai um avangin anmahni Setana hnena an inhralh thu hi zep lovin an lo puang chhuak tawh thin a. Naupan laia Pathian hla chauh sa thin, Katy Perry pawh hian TEN LIVE channel-in amah an interview tumin, “Kum 15 ka nih lai a music ka luhchilh tirh chuan Gospel Singer Amy Grant ang nih ka tum thin a, mahse ka hlawhchham avangin ‘ramhuai hnenah ka nun ka hralh ta a ni” tiin a sawi phawng mai a. Tin rapper Kanye West, Bob Dylan, Jay Z etc te pawhin hetiang hian thu an lo chhakchhuah tawh bakah anmahni awp bettu ramhuai a awm thu leh an hla phuah thenkhat te pawh heng ramhuai ho pek hi niin an sawi hial a ni. Hetiang deuh hian zaithiam tam tak te chuan an hlaah Setana nena an inlaichinna hrang hrang an tarlang a, a thenin fiah takin sawi mahse a then chuan love story leh an nun buaina behchhanin thukru ang reng takin an ti lang thung thin.

Hetianga Setana malsawmna dawnga an thil tumte tihhlawhtling tura Illuminati hovin zaithiam te an awpbeh hnu hian talchhuah an harsat a, an nunah buaina nasa tak a thleng zui thin niin sawi a ni. Zirchiangtute chuan rapper lar Tupac Shakur, King of Pop Michael Jackson, popstar Alliyah, guitar legend Jimi Hendrix etc te thihdan pawh kha Illuminati te thah niin an sawi a. Illuminati pawla lo awm tawh mi lar tak tak te’n he pawl atanga talchhuah an tum chuan Illuminati te remruatnain hmingchhiatna mak pui puiin a bawm a, a hnuah chhan hrang hrang i.e OD, kahhlum, inawkhlum, accident etc vangtein an thi zui thin niin an sawi.

Awle,Illuminati chungchang hi inhnialna chawkchhuak thei (controversial) tak anih avangin Illuminati te hi an awm tak tak leh tak tak lohah thu kan titlu chiang dawn lo va, mahse Setana chhinchhiahna leh Setana fakmawina hla thu tam tak te hian kan nitin nun, kan computer, mp3 player, kan mobile phone etc min luahchilh reng tawh a ni tih erawh hi chu controversial mai nilovin a chiang em em a ni. Kristian thalai ten eng hla nge kan ngaihthlak thin a, eng music video nge kan en thin? Kan thawmhnaw hak thleng hian Kristian thalai te hian Setana chhinchhiahna kan lo pu vu vu em? Heng thil lakah hian kan inthiar fihlim thiam a pawimawh takzet a, Pathian no leh Ramhuai no kan dawm kawp thei lo tih kan hriat nawn leh a va tul em.