ZAWLBUK 19/6/2016

AWLBUK WEEKY NEWSPAPER
Dt.19.6.2016 (Pahianni)

           YMA DAY LAMTLUANG

         YMA Day Vawi 81-na chu kan khua ah pawh chhun leh zan ah programme  siamin hun hlimawm tak kan hmang a, zingkar lamah kan hmun pawimawh tak Buizova zaina Sunhlu bul vel tifai leh thing thenkhat phunin Section thenkhat hnatlan ani a, Section khat (Darkhuma sec.) chuan chhun lama kan chet velna tur buaipuiin an lo buai ve hle. Memberte phu suau suau hmuh/hriat chuan ava hlimawm em !!! He hun hi hmanah chuan hmundang a awm tawh/zin te pawn mahni khua a hman tumin an/kan haw hram hram thin kha ani a, mahse eng kan ti ta nge, lo haw hmel hmuh tur an vang pharh mai, zan lamah programme pawimawh tak zirlai pass te chawimawina hun a awm chung pawh a rawn haw an awm ta manglo kha ( rawn haw chhunte an fakawm hle). Khawvelah kan awm a, hna tul hrang hrang leh pawimawhna kan nei ta thliah thliah hlawm a, kan tih tur pawh  ani na meuh mai, pawimawhna neilo a, awm mai mai nih chu a YMA miahlo a ni. Amaherawh chu YMA hlamchhiah silovin hun hman tum in rilru i seng ngai em?                                      
     Central YMA chuan “Ram leh Hnam Humhalh” kumah a puang a, chu chu zawm tho si in, kan Branch chuan “Kawtlang Nun Siamthat” kanlo belh ve leh bawk a, he thu Pahnih hi zawm thei ila chuan kan khawtlang, kan ram chhung alo nuamin a changkan phah ngawt ang. Chutianga kan lo changkan tak ah chuan  kan Ni pawimawh June Ni 15 pawh hi hlut tur leh a nih na ang hian kan hmang thiam ngei ang le. Holiday satliah nilovin, Mizoram a Pawl lian ber leh  tangkai ber din champha ani si a, he hun hmang tur hian ni khat tha leh zan khat hun tal chu pe thei turin insiamrem tur angaih leh rin ini a, mahse ti thei kha kan va thahnemlo si em !! YMA hi Changkan san chi ani lova, Hausak san chi pawh ani lova,Pianthar san chi pawh ani lova, Retheih vanga tlanchhiatsan chi lah ani hek lo, kha Ni pawimawh tak kha kan pianthar san ta mai emaw retheihna avangin kan tlan chhiat san ta mai emaw tih tur khawpin kan hlut tawhlo niin alang. Rethei te tana Pa chanchang Kristian Nundan tha ngaisangtu pawl hi i pian ni lawmpuitu che leh i hun tawp thleng a zuitu pawl ani tih in hrethar mawlh ang u.
          Kum 2016 YMA Day min hmanpuitu kan NGO pui, Mizoram Upa Pawl (MUP) leh Mizo Hmeichhe Insuihkhawm Pawl  (MHIP) te, YMA tan inhlu a, in inhruipawh a hmuh a nuamin, MHIP in Lamthai a mawi e...... Kan thawhhona azar ah kan khawtlang a nghahhlelhawm tak meuh meuh a ni. Kan Culture  (Hnam nunzia) tilang thei in Infiamna kan la thiamzia mawlh kha, Inbaideh, Rawlawn, Kalchhet kal leh adang te keini aia naute hnen a hrilh hretu nih tum zel ang u. Chutih rualin tunlai Infiamna pawh kan thiam tel kha, rual kan pawl zia tilang tu a ni. Sawi hmaih loh tur Inhruipawh mawlh kha, kan khaw hrui neih that pawh a chat zelin hrui thar hmanglo rual kan nih loh kha.... pui miah miah emai. Mit a hmulo leh Beng hmang a an thawm hrelo chu lenlai chan in ni. Zan lama zai mawi tak tak kan ngaithlak te, thusawi tha tak, chawp leh chilha zawm nghal chi kan ngaithla thei te kha ava ropui em. Ram leh Hnam Humhalhtu leh Khawtlang Nun Siamthatu YMA hi vul zel rawh se.....

LAWMTHU SAWINA
      Kan tupa Bike-a, a accident chungchang ah minpui a, min lakchhuah saktu E.Phaileng YMA te tha leh sum tamtak seng a inlo buaipui na ah kan lawm tak zet a, sum leh pai a kan tanpui theilo che u erawh pawi kan ti a, kan damchhung in kan theihnghilh tawh lo ang.
                                                              In khawngaihna dawngtu
                                                                 Chuangkima te Nupa
         Suangpuilawn, PWD veng 
              
CHANCHINTHAR
## Tv RS. Lalbiakdika s/o Laltlankima,Liana Section, Pu RK. Lawmsangzuala h/o Ramdinthari, Liana Section, Tv RK. Lalawmpuia s/o KV Tlangmawia, Buizova Section  Sipai tang te chu chawlh hmangin an rawn haw.
## Nl Lalropuii d/o R.Vanlalsiama (L) kan Branch Committee member Aizawl lama training a awm chu a damloh avangin Dt 15th.june.16 khan Nazareth Hospital ah admit ani a, tunah hian la enkawl mek zel ani a, dam leh thuai turin duhsakna kan hlan e.
## Nimin Dt 18th.June.16 khan Tv Zosangliana s/o Chhuma, Suangpuilawn khua chu Rungdil Road ah Bike in a che sual a, a bike hi kawngthlang ah tla in ala chhuak tur a YMA te min rawn pun angin member tlawmngai mi 50 chuang zet te chuan an lak chhuah sak a ni.
## Dt 16th.June.16 (Nilait-hawhtanni) khan Pu PC. Lallawmzuala Sumo chu 407 (SK) chuan su palhin ni hnih service thei lovin a awm a, tunah chuan an siamtha leh in Inrinni khan a rawn haw pui leh a ni.

KEIMAHNI
      Pathianni lo awm leh tur khi chanchinbu man khawn hun alo ni leh ta a, chanchinbu min laksak tuten khawngaih a minlo peksak leh theuh turin kan in ngen a ni.

PAGE-2

Dawntisei
“Vanduaina kan tih te pawh hi a dawngtu rilru a zir a ni”

Editorial -
   Kum 2016 chhunga YMA ten kan ni pawimawh ber chu kan lo hmang zo leh der tawh mai, ava uihawm em !!! Theih nise hman nawn a chakawm rum rum mai, chhunlam programme anuamin kan hlim tlang hle. A kallo te kan hlep hle a, amaherawhchu kalna chang hrelo khawpa YMA changkansan/thatchhiatsan kan awm ta nual emaw tih turin thalai, nu leh pa, YMA member a inpe si kan thahnem ta hle in alang. He hun hi midangte tanpuina ni-ah kan hmanglo chu thenkhat chuan min thiamlo maithei, mahse ti teh ang, YMA hi tanpuingaite tanpuitu chu a ni ngei mai. Mahse, kan him ve a thiang a, kan hlim ve ni dawn lawm’ni? Tu te emaw avangin vangvat kai chang te, tu te emaw avangin kan mittui tlak chang te, kan silhfen tha ber nen YMA thuthleng emaw bungraw thiar-a thlantlak zawih zawih changte YMA memberte hian kan lo tawng tawh a, kan tawn tur pawh a ni na meuh mai.Kan la tawng zel bawk ang,tawng tur pawn kan in peih theuh ang.YMA chu a dinchhan pawh  tanpuingaite tanpui ani a, chumi ti tur pawh chuan a in kau reng a ni. Mahse, YMA chu pawl ani a,memberte a in nghat a ni. Memberte’n kan ngaituahna, tha leh zung kan sen dan a zirin a chakin a chaklo tih kan hriat chian a pawimawh tak meuh meuh a ni. Chhiat i tawh emaw, puih i ngaih chang a,YMA member kalkhawm te hnen a lawmthu i sawi ringawt khan hruaitute emaw kalkhawmte rilru i hmin dawn chuanglo, chuvang chuan i thatlai leh vanglai hian YMA ah hian theih tawpin tha han thawh ve teh le. Thailaite u,in thatlai chen ula, tia min tiamtu hre reng chungin i YMA ila kan hlim anga, kan twrh chang alo thlen pawh a tuar... ngam ni turin i huaisen bawk ang u

YMA HUANG

## Nikum lama Endowment Fund dawng tur a, Central YMA a kan dilpui Pi Larchhuakmawii w/o Lalhruaizela leh Nl Lalsangzeli d/o H.Rodinga te chuan Endowment Fund hi Central YMA hnen atang hian an dawng a ni.
## Dt 13th.june.16 (thawtanni) khan VC ten ram min pek (Darkhuma hmun  tlang tlaklam) ah Branch pum huap thing phun hnatlang neih ani a, member 60 chuang lai mai kan thawk chhuak a ni. Tin, hemi a kan thing phun tur min phurh saktu Pu Lalhmu-chhuaka leh member thawk chhuak te chungah hruaitu te chuan lawmthu an sawi tak meuh meuh a ni.
## Dt 15th.june.16 (Nilaini) khan YMA Day pual zingkar hnatlang neih ani a, Darkhuma section ten chhunlam kan function hmanna tur an buaipui a, Rothai section, Liana section, Buizova section ten Buizova zaina hmun sam fai hnatlang neih a ni bawk ani.
## YMA Day pual hian Branch YMA chuan mi harsa te leh damlo kan ngai ni a ahriat te chhungkua pathum a thlang chhuak a, heng mite hnen ah hian pawisa leh buhfai pek an ni.
## YMA Day Vawi-81 na chu kan Branch pawhin Mizo Infiamna chi hrang hrang hmangin, Section hrang hrang te inelna neih ani a, a pumpui result chu hetiang hi a ni.
1. Liana Section          285  points
2. Buizova Section      130 points
3. Darkhuma Section  125 points
4. Rothai Section        110 points

        He mi bakah hian YMA chhang te Football khelh tir an ni bawk a, team li (4) ah inthen in “A” team te an Champion a ni. an lawmman tur hi kan VCP Tv Lalruatzela chuan a rawn tuma a chungah YMA te kan lawm hle a ni.
## Dt 18th.june.16 zingkar khan Branch  Executive Committee, Section OB te leh mi thenkhat ten NYK a thehluh tur thlalak na hun neih a ni. He kan thlalak avang hian hian Sum Rs.2100 kan dawng dawn ni in kan hria a, kal khawmte chungah kan lawm hle.

*HRIATTIRNA*
    Aizawl District Election Officer thupek angin *E.Phaileng Electoral Roll ah hming, pa hming, kum leh thlalak fiahlo, insawn duh leh hmun dang Electoral Roll a awm te, paih ngai* te kan awm anih chuan a hnuai a hming ziak te hnen ah hian Dt 25th june.16 ral hma ngeiin inhriattir vek tur a ni e.
1) Samuel Zosangliana (2) R. Lalthakima (3) R. Lalhmuaka

*C.HALL  LEH PLAYGROUND COMMITTEE*
Chairman   : H.Zonunmawia, BDO
V. Chairman : Lalruatzela, VCP
Secretary : K.Lalhruaitluanga, YMA
Memberte: R. Lalthakima, R. Lalhmu-aka, Phirkaia. Heng mite bak ah hian MHIP, YMA, MUP, GSA President te theuh an ni bawk a ni. 

*MIZORAM PEOPLE FORUM : EAST PHAILENG LOCAL FORUM THUCHHUAH*
Ni 16.6.2016 (Zirtawpni) Zingkara  East Phaileng MPF Local Forum thukawm chuan Kan khawtlanga hmasawnna tura sorkar hmalakna hrang hrang leh Sorkar thilsem chung chang leh hamthatna hrang hrang a pek chung changte a thlir a,heng thilah hian V.C. leh helama committee hrang hrangte chu dik tak leh rualkhai taka hma la zel turin leh hmathlir fel tak neia dikna nena kal zel turin a ngenin a sawm tak meuh a ni.
Sum leh pai leh thildanga hamthatna dawngtu mipui lamte pawhin an dawn ang ngeia hlawkpui nan leh hlawhtlin nan hmang ngei turte, sorkarin a pekna ang taka hmang turtein MPF Local Forum chuan a ngen tak meuh a ni
Mizoram People Forum,
East Phaileng MPF Local Forum
East Phaileng.

      *Ka Sumo ah Bag leh Rambo  Polythene theihnghilh ani a, a neitu chuan kan in ah rawn ngaihven tur a ni ang*
                        _Lalhualhima Driver_

_Publish and Edited By Editor, ZAWLBUK on behalf of YMA East Phaileng Branch_